1. Vasiṣṭha Dhanurveda Saṃhitā

श्रीमहर्षिवसिष्ठ प्रणीता धनुर्वेद संहिता

1.1

महर्षि वसिष्ठ विरचिता धनुर्वेदसंहिता अथैकदा विजिगीषुर्विश्वामित्रो राजर्षिर्गुरुवसिष्ठमभ्युपेत्य प्रणम्योवाच । ब्रूहि भगवन् धनुर्विद्यां श्रोत्रियाय दृढचेतसे शिष्याय दुष्टशत्रुविनाशाय च । तमुवाच महर्षिब्रह्मर्षिप्रवरो वसिष्ठः शृणु भो राजन् विश्वामित्र यां सरहस्य- धनुर्विद्यां भगवान् सदाशिवः परशुरामायोवाच तामेव सरहस्यां वच्मि ते हिताय गोब्राह्मणसाधुवेदसंरक्षणाय च यजुर्वेदाथर्व सम्मितां संहिताम् अथोवाच महादेवो भार्गवाय च धीमते तत्तेऽहं संप्रवक्ष्यामि यथातथ्येन संशृणु

maharṣi vasiṣṭha viracitā dhanurvedasaṃhitā athaikadā vijigīṣurviśvāmitro rājarṣirguruvasiṣṭhamabhyupetya praṇamyovāca | brūhi bhagavan dhanurvidyāṃ śrotriyāya dṛḍhacetase śiṣyāya duṣṭaśatruvināśāya ca | tamuvāca maharṣibrahmarṣipravaro vasiṣṭhaḥ śṛṇu bho rājan viśvāmitra yāṃ sarahasya- dhanurvidyāṃ bhagavān sadāśivaḥ paraśurāmāyovāca tāmeva sarahasyāṃ vacmi te hitāya gobrāhmaṇasādhuvedasaṃrakṣaṇāya ca yajurvedātharva sammitāṃ saṃhitām athovāca mahādevo bhārgavāya ca dhīmate tatte'haṃ saṃpravakṣyāmi yathātathyena saṃśṛṇu

1.2

तत्र चतुष्टयपादात्मको धनुर्वेदः । यस्य प्रथमे पादे दीक्षाप्रकारः । द्वितीये संग्रहः तृतीये सिद्धप्रयोगाः चतुर्थे प्रयोगविधयः

tatra catuṣṭayapādātmako dhanurvedaḥ | yasya prathame pāde dīkṣāprakāraḥ | dvitīye saṃgrahaḥ tṛtīye siddhaprayogāḥ caturthe prayogavidhayaḥ

1.3

अथ कस्य धनुर्वेदाधिकार इत्यपेक्षायामाह धनुर्वेदे गुरुर्विप्रः प्रोक्तो वर्णद्वयस्य च युद्धाधिकारः शूद्रस्य स्वयं व्यापादि शिक्षया

atha kasya dhanurvedādhikāra ityapekṣāyāmāha dhanurvede gururvipraḥ prokto varṇadvayasya ca yuddhādhikāraḥ śūdrasya svayaṃ vyāpādi śikṣayā

1.4

चतुर्विधमायुधम् । मुक्तममुक्तंमुक्तामुक्तं- यन्त्रमुक्तञ्चेति

caturvidhamāyudham | muktamamuktaṃmuktāmuktaṃ- yantramuktañceti

1.5

दुष्टदस्युचोरादिभ्य साधुसंरक्षणं धर्म्मतः प्रजापालनं धनुर्वेदस्य प्रयोजनम्

duṣṭadasyucorādibhya sādhusaṃrakṣaṇaṃ dharmmataḥ prajāpālanaṃ dhanurvedasya prayojanam

1.6

एकापि यत्र नगरे प्रसिद्धः स्याद्धनुर्द्धरः ततो यान्त्यरयो दूरान्मृगाः सिंहगृहादिव

ekāpi yatra nagare prasiddhaḥ syāddhanurddharaḥ tato yāntyarayo dūrānmṛgāḥ siṃhagṛhādiva

1.7

आचार्य्येण धनुर्द्देयं ब्राह्मणे सुपरीक्षिते लुब्धे धूर्त्ते कृतघ्ने च मन्दबुद्धौ न दापयेत्

ācāryyeṇa dhanurddeyaṃ brāhmaṇe suparīkṣite lubdhe dhūrtte kṛtaghne ca mandabuddhau na dāpayet

1.8

ब्राह्मणाय धनुर्द्देयं खड्गं वै क्षत्रियाय च वैश्याय दापयेत् कुन्तं गदां शूद्राय दापयेत्

brāhmaṇāya dhanurddeyaṃ khaḍgaṃ vai kṣatriyāya ca vaiśyāya dāpayet kuntaṃ gadāṃ śūdrāya dāpayet

1.9

धनुश्चक्रञ्च कुन्तञ्च खड्गञ्च क्षुरिका गदा सप्तमं बाहुयुद्धं स्यादेवं युद्धानि सप्तधा

dhanuścakrañca kuntañca khaḍgañca kṣurikā gadā saptamaṃ bāhuyuddhaṃ syādevaṃ yuddhāni saptadhā

1.10

अथाचार्य्यलक्षणम् आचार्य्यः सप्तयुद्धः स्याच्चतुर्भिर्भार्गवः स्मृतः द्वाभ्यां चैव भवेद्योध एकेन गणको भवेत्

athācāryyalakṣaṇam ācāryyaḥ saptayuddhaḥ syāccaturbhirbhārgavaḥ smṛtaḥ dvābhyāṃ caiva bhavedyodha ekena gaṇako bhavet

1.11

हस्तः पुनर्वसुः पुष्यो रोहिणी चोत्तरात्रयम् अनुराधाश्विनी चैव रेवती दशमी तथा

hastaḥ punarvasuḥ puṣyo rohiṇī cottarātrayam anurādhāśvinī caiva revatī daśamī tathā

1.12

जन्मस्थे च तृतीये च षष्ठे वै सप्तमे तथा दशमैकादशे चन्द्रे सर्वकार्य्याणि कारयेत्

janmasthe ca tṛtīye ca ṣaṣṭhe vai saptame tathā daśamaikādaśe candre sarvakāryyāṇi kārayet

1.13

तृतीया पञ्चमी चैव सप्तमी दशमी तथा त्रयोदशी द्वादशी च तिथयस्तु शुभामताः

tṛtīyā pañcamī caiva saptamī daśamī tathā trayodaśī dvādaśī ca tithayastu śubhāmatāḥ

1.14

रविवारः शुक्रवारो गुरुवारस्तथैव च एतद्वारं त्रयं धन्यं प्रारम्भे शस्त्रकर्म्मणाम्

ravivāraḥ śukravāro guruvārastathaiva ca etadvāraṃ trayaṃ dhanyaṃ prārambhe śastrakarmmaṇām

1.15

एभिर्द्दिनैस्तु शिष्याय गुरुः शास्त्राणि दापयेत् सन्तर्प्य दानहोमाभ्यां सुरान् स्वाहा विधानतः

ebhirddinaistu śiṣyāya guruḥ śāstrāṇi dāpayet santarpya dānahomābhyāṃ surān svāhā vidhānataḥ

1.16

ब्राह्मणान् भोजयेत् तत्र कुमारींश्चाप्यनेकशः तापसानर्च्चयेद्भक्त्या ये चान्ये शिवयोगिनः

brāhmaṇān bhojayet tatra kumārīṃścāpyanekaśaḥ tāpasānarccayedbhaktyā ye cānye śivayoginaḥ

1.17

अन्नपानादिभिश्चैव वस्त्रालङ्कारभूषणैः गन्धमाल्यैर्विचित्रैश्च गुरुं तत्र प्रपूजयेत्

annapānādibhiścaiva vastrālaṅkārabhūṣaṇaiḥ gandhamālyairvicitraiśca guruṃ tatra prapūjayet

1.18

कृतोपवासः शिष्यस्तु धृताजिन परिग्रहः बद्धाञ्जलिपुटस्तत्र याचयेद् गुरुतो धनुः

kṛtopavāsaḥ śiṣyastu dhṛtājina parigrahaḥ baddhāñjalipuṭastatra yācayed guruto dhanuḥ

1.19

अङ्गन्यासं ततः कार्य्यं शिवोक्तं सिद्धिमिच्छता आचार्य्येण च शिष्यस्य पापघ्नं विघ्ननाशनम्

aṅganyāsaṃ tataḥ kāryyaṃ śivoktaṃ siddhimicchatā ācāryyeṇa ca śiṣyasya pāpaghnaṃ vighnanāśanam

1.20

शिखास्थाने न्यसेदीशं बाहुयुग्मे च केशवम् ब्रह्माणं नाभिमध्ये तु जङ्घयोश्च गणाधिपम्

śikhāsthāne nyasedīśaṃ bāhuyugme ca keśavam brahmāṇaṃ nābhimadhye tu jaṅghayośca gaṇādhipam

1.21

ॐ ह्रीं शिखा स्थाने शङ्कराय नमः ॐ ह्रीं बाह्वोः केशवाय नमः ॐ ह्रीं नाभिमध्ये ब्रह्मणे नमः ॐ ह्रीं जङ्घयोर्गणपतये नमः

ॐ hrīṃ śikhā sthāne śaṅkarāya namaḥ ॐ hrīṃ bāhvoḥ keśavāya namaḥ ॐ hrīṃ nābhimadhye brahmaṇe namaḥ ॐ hrīṃ jaṅghayorgaṇapataye namaḥ

1.22

ईदृशं कारयेद् न्यासं येन श्रेयो भविष्यति अन्येऽपि दुष्टमन्त्रेण न हिंसन्ति कदाचन

īdṛśaṃ kārayed nyāsaṃ yena śreyo bhaviṣyati anye'pi duṣṭamantreṇa na hiṃsanti kadācana

1.23

शिष्याय मानुषं चापं धनुर्मन्त्राभिमन्त्रितम् काण्डात् काण्डाति मन्त्रेण दद्याद्वेदविधानतः

śiṣyāya mānuṣaṃ cāpaṃ dhanurmantrābhimantritam kāṇḍāt kāṇḍāti mantreṇa dadyādvedavidhānataḥ

1.24

अथ वेधविधिः प्रथमं पुष्पवेधं च फलहीनेन पत्रिणा ततः फलयुतेनैव मत्स्यवेधं च कारयेत्

atha vedhavidhiḥ prathamaṃ puṣpavedhaṃ ca phalahīnena patriṇā tataḥ phalayutenaiva matsyavedhaṃ ca kārayet

1.25

एतैर्वेधैः कृतैः पुंसां शराः स्युः सर्वसाधकाः

etairvedhaiḥ kṛtaiḥ puṃsāṃ śarāḥ syuḥ sarvasādhakāḥ

1.26

वेधने चैव मांसस्य शरपातो यदा भवेत् पूर्व दिग्भागमाश्रित्य तदा स्याद्विजयी सुखी

vedhane caiva māṃsasya śarapāto yadā bhavet pūrva digbhāgamāśritya tadā syādvijayī sukhī

1.27

दक्षिणे कलहो घोरो विदेशगमनं पुनः पश्चिमे धनधान्यञ्च सर्वञ्चैवोत्तरे शुभम्

dakṣiṇe kalaho ghoro videśagamanaṃ punaḥ paścime dhanadhānyañca sarvañcaivottare śubham

1.28

ऐशान्यां पवनं दुष्टं विदिशोऽन्यांश्च शोभनाः हर्षपुष्टिकराश्चैव सिद्धिदाः सर्वकर्म्मणि

aiśānyāṃ pavanaṃ duṣṭaṃ vidiśo'nyāṃśca śobhanāḥ harṣapuṣṭikarāścaiva siddhidāḥ sarvakarmmaṇi

1.29

एवं वेधत्रयङ्कुर्याच्छङ्खं दुन्दुभिनिस्वनैः ततः प्रणम्य गुरवे धनुर्बाणान्निवेदयेत्

evaṃ vedhatrayaṅkuryācchaṅkhaṃ dundubhinisvanaiḥ tataḥ praṇamya gurave dhanurbāṇānnivedayet

1.30

अथ चापप्रमाणम् प्रथमं यौगिकं चापं युद्धचापं द्वितीयकम् निजबाहुबलोन्मानात् किञ्चिदूनं शुभं धनुः

atha cāpapramāṇam prathamaṃ yaugikaṃ cāpaṃ yuddhacāpaṃ dvitīyakam nijabāhubalonmānāt kiñcidūnaṃ śubhaṃ dhanuḥ

1.31

वरं प्राणाधिको धन्वी न तु प्राणाधिकं धनुः धनुषा पीड्यमानस्तु धन्वी लक्ष्यं न पश्यति

varaṃ prāṇādhiko dhanvī na tu prāṇādhikaṃ dhanuḥ dhanuṣā pīḍyamānastu dhanvī lakṣyaṃ na paśyati

1.32

अतो निजबलोन्मानं चापं स्याच्छुभकारकम् देवानामुत्तमं चापं ततो न्यूनं च मानवम्

ato nijabalonmānaṃ cāpaṃ syācchubhakārakam devānāmuttamaṃ cāpaṃ tato nyūnaṃ ca mānavam

1.33

अर्द्धपञ्चमहस्तन्तु श्रेष्ठं चापं प्रकीर्त्तितम् तद्विज्ञेयं धनुर्दिव्यं शङ्करेण धृतं पुरा

arddhapañcamahastantu śreṣṭhaṃ cāpaṃ prakīrttitam tadvijñeyaṃ dhanurdivyaṃ śaṅkareṇa dhṛtaṃ purā

1.34

चतुर्विंशाङ्गुलो हस्तश्चतुर्हस्तं धनुः स्मृतम् तद्भवेनमानवं चापं सर्वलक्षणसंयुतम्

caturviṃśāṅgulo hastaścaturhastaṃ dhanuḥ smṛtam tadbhavenamānavaṃ cāpaṃ sarvalakṣaṇasaṃyutam

1.35

अथ शुभचापलक्षणम् त्रिपर्वं पञ्चपर्वं वा सप्तपर्वं तथा पुनः नव पर्वञ्च कोदण्डं सर्वदा शुभकारकम्

atha śubhacāpalakṣaṇam triparvaṃ pañcaparvaṃ vā saptaparvaṃ tathā punaḥ nava parvañca kodaṇḍaṃ sarvadā śubhakārakam

1.36

चतुष्पर्वञ्च षट्पर्वं अष्टपर्वं विवर्ज्जयेत्

catuṣparvañca ṣaṭparvaṃ aṣṭaparvaṃ vivarjjayet

1.37

केषाञ्चिच्च भवेच्चापं वितस्तिनवसम्मितम्

keṣāñcicca bhaveccāpaṃ vitastinavasammitam

1.38

अथ वर्ज्जितधनुः अतिजीर्णमपक्वञ्च ज्ञातिधृष्टन्तथैव च दग्धं छिद्रं न कर्त्तव्यं बाह्याभ्यन्तरहस्तकम्

atha varjjitadhanuḥ atijīrṇamapakvañca jñātidhṛṣṭantathaiva ca dagdhaṃ chidraṃ na karttavyaṃ bāhyābhyantarahastakam

1.39

गुणहीनं गुणाक्रान्तं काण्डदोषसमन्वितम् गलग्रन्थि न कर्त्तव्यं तलमध्ये तथैव च

guṇahīnaṃ guṇākrāntaṃ kāṇḍadoṣasamanvitam galagranthi na karttavyaṃ talamadhye tathaiva ca

1.40

अपक्वं भङ्गमायाति ह्यतिजीर्णन्तु कर्कशम् ज्ञातिधृष्टं तु सोद्वेगं कलहो बान्धवैः सह

apakvaṃ bhaṅgamāyāti hyatijīrṇantu karkaśam jñātidhṛṣṭaṃ tu sodvegaṃ kalaho bāndhavaiḥ saha

1.41

दग्धेन दह्यते वेश्म छिद्रं युद्धविनाशकम् बाह्ये लक्ष्यं न लभ्येत तथैवाभ्यन्तरेऽपि च

dagdhena dahyate veśma chidraṃ yuddhavināśakam bāhye lakṣyaṃ na labhyeta tathaivābhyantare'pi ca

1.42

हीने तु सन्धिते बाणे संग्रामे भङ्गकारकम् आक्रान्ते तु पुनः क्वापि लक्ष्यं न प्राप्यते दृढम्

hīne tu sandhite bāṇe saṃgrāme bhaṅgakārakam ākrānte tu punaḥ kvāpi lakṣyaṃ na prāpyate dṛḍham

1.43

गलग्रान्थितलग्रन्थिधनहानिकरं धनुः एभिर्दोषैर्विनिर्मुक्तं सर्वकार्य्यकरं स्मृतम्

galagrānthitalagranthidhanahānikaraṃ dhanuḥ ebhirdoṣairvinirmuktaṃ sarvakāryyakaraṃ smṛtam

1.44

शार्ङ्गं पुनर्धनुर्दिव्यं विष्णोः परमायुधम् वितस्ति सप्तमं मानं निर्म्मितं विश्वकर्म्मणा

śārṅgaṃ punardhanurdivyaṃ viṣṇoḥ paramāyudham vitasti saptamaṃ mānaṃ nirmmitaṃ viśvakarmmaṇā

1.45

न स्वर्गे न च पाताले न भूमौ कस्यचित् करे तद्धनुर्वशमायाति मुक्तैकं पुरुषोत्तमम्

na svarge na ca pātāle na bhūmau kasyacit kare taddhanurvaśamāyāti muktaikaṃ puruṣottamam

1.46

पौरुषेयं तु यच्छार्ङ्गं बहुवत्सरशोभितम् वितस्तिभिर्सार्द्धषड्भिनिर्म्मितं चार्थसाधनम्

pauruṣeyaṃ tu yacchārṅgaṃ bahuvatsaraśobhitam vitastibhirsārddhaṣaḍbhinirmmitaṃ cārthasādhanam

1.47

प्रायो योज्यं धनुः शार्ङ्गं गजारोहाश्वसादिनाम् रथीनां च पदातीनां वांशं चापं प्रकीर्त्तितम्

prāyo yojyaṃ dhanuḥ śārṅgaṃ gajārohāśvasādinām rathīnāṃ ca padātīnāṃ vāṃśaṃ cāpaṃ prakīrttitam

1.48

विश्वामित्र शृणुष्वाथ धनुर्द्रव्यत्रयं क्रमात् लोहं शृङ्गञ्च काष्ठञ्च गदितं शम्भुना पुरा

viśvāmitra śṛṇuṣvātha dhanurdravyatrayaṃ kramāt lohaṃ śṛṅgañca kāṣṭhañca gaditaṃ śambhunā purā

1.49

लोहानि स्वर्णरजतताम्रकृष्णायसानि शृङ्गाणि महिषशरभरोहितानाम् शरभोऽष्टपाद् चतुरूर्द्ध्वपादो महाविषाण उष्ट्रमितो वनस्थः काश्मीरदेशप्रसिद्धो मृगाख्यः दारूणि चन्दनवेत्रसाधावनशालशाल्मलि साकककुभवंशाञ्जनानाम्

lohāni svarṇarajatatāmrakṛṣṇāyasāni śṛṅgāṇi mahiṣaśarabharohitānām śarabho'ṣṭapād caturūrddhvapādo mahāviṣāṇa uṣṭramito vanasthaḥ kāśmīradeśaprasiddho mṛgākhyaḥ dārūṇi candanavetrasādhāvanaśālaśālmali sākakakubhavaṃśāñjanānām

1.50

अथ गुण लक्षणानि गुणानां लक्षणं वक्ष्ये यादृशं कारयेद्गुणम् पट्टसूत्रो गुणः कार्य्यः कनिष्ठामानसम्मितः

atha guṇa lakṣaṇāni guṇānāṃ lakṣaṇaṃ vakṣye yādṛśaṃ kārayedguṇam paṭṭasūtro guṇaḥ kāryyaḥ kaniṣṭhāmānasammitaḥ

1.51

धनुः प्रमाणो निःसन्धिः शुद्धैस्त्रिगुणतन्तुभिः वर्त्तितः स्याद्गुणः श्लक्ष्णः सर्वकर्म्मसहो युधि

dhanuḥ pramāṇo niḥsandhiḥ śuddhaistriguṇatantubhiḥ varttitaḥ syādguṇaḥ ślakṣṇaḥ sarvakarmmasaho yudhi

1.52

अभावे पट्टसूत्रस्य हरिणीस्नायुरिष्यते गुणार्थमपि च ग्राह्या स्नायवो महिषी भवाः

abhāve paṭṭasūtrasya hariṇīsnāyuriṣyate guṇārthamapi ca grāhyā snāyavo mahiṣī bhavāḥ

1.53

तत्कालहतछागस्य तन्तुना वा गुणाः शुभाः निर्लोमतन्तुसूत्रेण कुर्य्याद्वा गुणमुत्तमम्

tatkālahatachāgasya tantunā vā guṇāḥ śubhāḥ nirlomatantusūtreṇa kuryyādvā guṇamuttamam

1.54

पक्ववंशत्वचः कार्य्यो गुणस्तु स्थावरो दृढ पट्टसूत्रेण सन्नद्धः सर्वकर्म्मसहो युधि

pakvavaṃśatvacaḥ kāryyo guṇastu sthāvaro dṛḍha paṭṭasūtreṇa sannaddhaḥ sarvakarmmasaho yudhi

1.55

प्राप्ते भाद्रपदेमासि त्वगर्कस्य प्रशस्यते तस्यास्तत्र गुणः कार्य्यो न वित्तः स्थावरो दृढः

prāpte bhādrapademāsi tvagarkasya praśasyate tasyāstatra guṇaḥ kāryyo na vittaḥ sthāvaro dṛḍhaḥ

1.56

गुणाः कार्य्या समुञ्जानां भङ्गस्नाय्वर्कवर्म्मिणाम् अथ शरलक्षणानि अतः परं प्रवक्ष्यामि शराणां लक्षणं शुभम् स्थूलं नाति सूक्ष्मञ्च नोऽपक्वं न कुभूमिजम्

guṇāḥ kāryyā samuñjānāṃ bhaṅgasnāyvarkavarmmiṇām atha śaralakṣaṇāni ataḥ paraṃ pravakṣyāmi śarāṇāṃ lakṣaṇaṃ śubham sthūlaṃ nāti sūkṣmañca no'pakvaṃ na kubhūmijam

1.57

हीनग्रन्थिविदीर्णं च वर्जयेदीदृशं शरम् पूर्णग्रन्थिं सुपक्वं च पाण्डुरं समयाहृतम्

hīnagranthividīrṇaṃ ca varjayedīdṛśaṃ śaram pūrṇagranthiṃ supakvaṃ ca pāṇḍuraṃ samayāhṛtam

1.58

शरवंशा गृहीतव्या शरत्काले च गाधिज

śaravaṃśā gṛhītavyā śaratkāle ca gādhija

1.59

कठिनं वर्त्तुलं काण्डं गृह्वीयात् सुप्रदेशजम् द्वौ हस्तौ मुष्टिहीनौ च दैर्घ्ये स्थूले कनिष्ठिका विधेयाः शरमानेषु यन्त्रेष्वाकर्षयेत् ततः

kaṭhinaṃ varttulaṃ kāṇḍaṃ gṛhvīyāt supradeśajam dvau hastau muṣṭihīnau ca dairghye sthūle kaniṣṭhikā vidheyāḥ śaramāneṣu yantreṣvākarṣayet tataḥ

1.60

काकहंसशशादानां मत्स्यादक्रौञ्चकेकिनाम् गृध्राणां कुरराणाञ्च पक्षा एते सुशोभनाः

kākahaṃsaśaśādānāṃ matsyādakrauñcakekinām gṛdhrāṇāṃ kurarāṇāñca pakṣā ete suśobhanāḥ

1.61

षडङ्गुलप्रमाणेन पक्षच्छेदञ्च कारयेत् दशाङ्गुलमिता पक्षा शार्ङ्गचापस्य मार्गणे

ṣaḍaṅgulapramāṇena pakṣacchedañca kārayet daśāṅgulamitā pakṣā śārṅgacāpasya mārgaṇe

1.62

योज्या दृढाश्चतुः संख्याः सन्नद्धाः स्नायुतन्तुभिः शराश्च त्रिविधा ज्ञेयाः स्त्रीपुंसाश्च नपुंसकः व्यग्रस्थूलो भवेन्नारी पश्चात् स्थूलो भवेत् पुमान्

yojyā dṛḍhāścatuḥ saṃkhyāḥ sannaddhāḥ snāyutantubhiḥ śarāśca trividhā jñeyāḥ strīpuṃsāśca napuṃsakaḥ vyagrasthūlo bhavennārī paścāt sthūlo bhavet pumān

1.63

समो नपुंसको ज्ञेय तल्लक्ष्यार्थे प्रशस्यते दूर पातो युवत्या च पुरुषो भेदयेद् दृढम्

samo napuṃsako jñeya tallakṣyārthe praśasyate dūra pāto yuvatyā ca puruṣo bhedayed dṛḍham

1.64

अथ फललक्षणम् आरामुखं क्षुरप्रञ्च गोपुच्छं चार्द्धचन्द्रकम् सूचीमुखञ्च भल्लञ्च वत्सदन्तं द्विभल्लकम्

atha phalalakṣaṇam ārāmukhaṃ kṣuraprañca gopucchaṃ cārddhacandrakam sūcīmukhañca bhallañca vatsadantaṃ dvibhallakam

1.65

कर्णिकं काकतुण्डं च तथान्यान्यप्यनेकशः फलानि देशभेदेन भवन्ति बहुरूपतः

karṇikaṃ kākatuṇḍaṃ ca tathānyānyapyanekaśaḥ phalāni deśabhedena bhavanti bahurūpataḥ

1.66

अथैतेषां कर्म्माणि आरा मुखेन चर्म्मछेदनम् क्षुरप्रेण बाणकर्त्तनम् वा बाहुकर्त्तनम् गोपुच्छेन लक्ष्यसाधनम् अर्द्धचन्द्रेण ग्रीवा मस्तकधनुरादीनां छेदनम् सूचीमुखेन कवच भेदनम् भल्लेन हृदय- भेदनम् वत्सदन्तेन गुणचर्व्वणम् द्विभल्लेन बाणावरोधनम् कर्णिकेन लोहमयबाणानां छेदनम् काकतुण्डेन वेध्यानां वेधं कुर्य्यात्

athaiteṣāṃ karmmāṇi ārā mukhena carmmachedanam kṣurapreṇa bāṇakarttanam vā bāhukarttanam gopucchena lakṣyasādhanam arddhacandreṇa grīvā mastakadhanurādīnāṃ chedanam sūcīmukhena kavaca bhedanam bhallena hṛdaya- bhedanam vatsadantena guṇacarvvaṇam dvibhallena bāṇāvarodhanam karṇikena lohamayabāṇānāṃ chedanam kākatuṇḍena vedhyānāṃ vedhaṃ kuryyāt

1.67

अन्यद्गोपुच्छकं ज्ञेयं शुद्धकाष्ठविनिर्म्मितम् मुखे च लोहकण्टेन विद्धं त्र्यङ्गुलसम्मितम्

anyadgopucchakaṃ jñeyaṃ śuddhakāṣṭhavinirmmitam mukhe ca lohakaṇṭena viddhaṃ tryaṅgulasammitam

बाणस्य फलस्थाने कण्टकयोजनात् गोपुच्छबाणो भवति अनेन शराभ्यासस्तथा लक्ष्याभ्यासो वा कर्त्तव्यः

bāṇasya phalasthāne kaṇṭakayojanāt gopucchabāṇo bhavati anena śarābhyāsastathā lakṣyābhyāso vā karttavyaḥ

1.69

अथ पायनम् (शरोपरि औषधलेपनम् ) इषु फले शरवंशामूललेपनाद् ब्रह्मणोऽसाध्यो भवति तच्चिह्नमतेत् । यस्मिन् शरवंशसमूहे । स्वाति बिन्दुर्निपतति स पीतवर्णो भवति तस्य मूले विषमुत्पद्यते तन्मूलं ग्राह्यं । स च सर्वदा पवनाभावेऽपि कम्पते इदमेव तल्लक्ष्मेति

atha pāyanam (śaropari auṣadhalepanam ) iṣu phale śaravaṃśāmūlalepanād brahmaṇo'sādhyo bhavati taccihnamatet | yasmin śaravaṃśasamūhe | svāti bindurnipatati sa pītavarṇo bhavati tasya mūle viṣamutpadyate tanmūlaṃ grāhyaṃ | sa ca sarvadā pavanābhāve'pi kampate idameva tallakṣmeti

1.70

फलस्य पायनं वक्ष्ये दिव्यौषधिविलेपनैः येन दुर्भेद्यवर्म्माणि भेदयेत्तरुपर्णवत्

phalasya pāyanaṃ vakṣye divyauṣadhivilepanaiḥ yena durbhedyavarmmāṇi bhedayettaruparṇavat

1.71

पिप्पली सैन्धवं कुष्ठं गोमूत्रे तु सुपेषयेत् अनेन लेपयेच्छस्त्रं लिप्तं चाग्नौ प्रतापयेत्

pippalī saindhavaṃ kuṣṭhaṃ gomūtre tu supeṣayet anena lepayecchastraṃ liptaṃ cāgnau pratāpayet

1.72

शिखिग्रीवानुवर्णाभं तप्तपीतं तथौषधम् ततस्तु विमलं तोयं पाययेच्छस्त्रमुत्तमम्

śikhigrīvānuvarṇābhaṃ taptapītaṃ tathauṣadham tatastu vimalaṃ toyaṃ pāyayecchastramuttamam

1.73

अथ नाराचनालीकशतघ्नीनां वर्णनम् सर्व लोहास्तु ये बाणा नाराचास्ते प्रकीर्त्तिताः पञ्चभिः पृथुलैः पक्षैर्युक्ताः सिद्धयन्ति कस्यचित्

atha nārācanālīkaśataghnīnāṃ varṇanam sarva lohāstu ye bāṇā nārācāste prakīrttitāḥ pañcabhiḥ pṛthulaiḥ pakṣairyuktāḥ siddhayanti kasyacit

1.74

नालीका लघवो बाणा नलयन्त्रेण नोदिताः अत्युच्चदूरपातेषु दुर्गयुद्धेषु ते मताः

nālīkā laghavo bāṇā nalayantreṇa noditāḥ atyuccadūrapāteṣu durgayuddheṣu te matāḥ

1.75

सिंहासनस्य रक्षार्थं शतघ्नं स्थापयेत् गढे रंजकंबहुलं तत्र स्थाप्यं वटयो धीमता

siṃhāsanasya rakṣārthaṃ śataghnaṃ sthāpayet gaḍhe raṃjakaṃbahulaṃ tatra sthāpyaṃ vaṭayo dhīmatā

1.76

अथ स्थानमुष्ट्याकर्षणलक्षणानि स्थान्यष्टौ विधेयानि योजने भिन्नकर्म्मणाम् मुष्ट्यः पञ्चसमाख्याता व्यायाः पञ्च प्रकीर्त्तिताः

atha sthānamuṣṭyākarṣaṇalakṣaṇāni sthānyaṣṭau vidheyāni yojane bhinnakarmmaṇām muṣṭyaḥ pañcasamākhyātā vyāyāḥ pañca prakīrttitāḥ

1.77

अग्रतो वामपादश्च दक्षिणं चानुकुञ्चितम् प्रत्यालीढं प्रकर्त्तव्यं हस्तद्वयसविस्तरम्

agrato vāmapādaśca dakṣiṇaṃ cānukuñcitam pratyālīḍhaṃ prakarttavyaṃ hastadvayasavistaram

1.78

आलीढे तु प्रकर्त्तव्यं सव्यं चैवानुकुञ्चितम् दक्षिणन्तु पुरस्ताद्वा दूरपाते विशिष्यते

ālīḍhe tu prakarttavyaṃ savyaṃ caivānukuñcitam dakṣiṇantu purastādvā dūrapāte viśiṣyate

1.79

पादौ सविस्तरौ कार्य्यौ समौ हस्तप्रमाणतः विशाखस्थानकं ज्ञेयं कूटलक्ष्यस्य वेधने

pādau savistarau kāryyau samau hastapramāṇataḥ viśākhasthānakaṃ jñeyaṃ kūṭalakṣyasya vedhane

1.80

समपादैः समौ पादौ निष्कम्पौ च सुसङ्गतौ असमे च पुरो वामे हस्तमात्रनतं वपुः

samapādaiḥ samau pādau niṣkampau ca susaṅgatau asame ca puro vāme hastamātranataṃ vapuḥ

1.81

आकुञ्चितोरुद्वौ यत्र जानुभ्यां धरणीं गतौ दर्दुरक्रममित्याहुः स्थानकं दृढभेदने

ākuñcitorudvau yatra jānubhyāṃ dharaṇīṃ gatau dardurakramamityāhuḥ sthānakaṃ dṛḍhabhedane

1.82

सव्यं जानुगतौ भूमौ दक्षिणं च सकुञ्चितम् अग्रतो यत्र दातव्यं तद्विद्याद्गरुडक्रमम्

savyaṃ jānugatau bhūmau dakṣiṇaṃ ca sakuñcitam agrato yatra dātavyaṃ tadvidyādgaruḍakramam

1.83

पद्मासनं प्रसिद्धन्तु ह्युपविश्य यथाक्रमम् धन्विनां तत्तुविज्ञेयं स्थानकं शुभलक्षणम्

padmāsanaṃ prasiddhantu hyupaviśya yathākramam dhanvināṃ tattuvijñeyaṃ sthānakaṃ śubhalakṣaṇam

1.84

अथ गुणमुष्टिः पताका वज्रमुष्टिश्च सिंहकर्णस्तथैव च मत्सरी काकतुण्डी च योजनीया यथाक्रमम्

atha guṇamuṣṭiḥ patākā vajramuṣṭiśca siṃhakarṇastathaiva ca matsarī kākatuṇḍī ca yojanīyā yathākramam

1.85

दीर्घा तु तर्ज्जनी यत्र ह्याश्रिताङ्गुष्ठमूलकम् पताका सा च विज्ञेया नालिका दूरमोक्षणैः

dīrghā tu tarjjanī yatra hyāśritāṅguṣṭhamūlakam patākā sā ca vijñeyā nālikā dūramokṣaṇaiḥ

1.86

तर्ज्जनी मध्यमा मध्यं अङ्गुष्ठो विशते यदि वज्रमुष्टिस्तु सा ज्ञेया स्थूले नाराचमोक्षणैः

tarjjanī madhyamā madhyaṃ aṅguṣṭho viśate yadi vajramuṣṭistu sā jñeyā sthūle nārācamokṣaṇaiḥ

1.87

अङ्गुष्ठमध्यदेशन्तु तर्जन्यग्रं शुभं स्थितम् सिंहकर्णः स विज्ञेयो दृढलक्ष्यस्य वेधने

aṅguṣṭhamadhyadeśantu tarjanyagraṃ śubhaṃ sthitam siṃhakarṇaḥ sa vijñeyo dṛḍhalakṣyasya vedhane

1.88

अङ्गुष्ठनखमूले तु तर्ज्जन्यग्रञ्च संस्थितम् मत्सरी सा च विज्ञेया चित्रलक्ष्यस्य वेधने

aṅguṣṭhanakhamūle tu tarjjanyagrañca saṃsthitam matsarī sā ca vijñeyā citralakṣyasya vedhane

1.89

अङ्गुष्ठाग्रे तु तर्जन्यां मुखं यत्र निवेशितम् काकतुण्डी च सा ज्ञेया सूक्ष्मलक्ष्येषु योजिता

aṅguṣṭhāgre tu tarjanyāṃ mukhaṃ yatra niveśitam kākatuṇḍī ca sā jñeyā sūkṣmalakṣyeṣu yojitā

1.90

अथ धनुर्मुष्टिसन्धानम् सन्धानं त्रिविधं प्रोक्तमधमूर्द्धं समं सदा योजयेत् त्रिप्रकारं हि कार्य्येष्वपि यथाक्रमम्

atha dhanurmuṣṭisandhānam sandhānaṃ trividhaṃ proktamadhamūrddhaṃ samaṃ sadā yojayet triprakāraṃ hi kāryyeṣvapi yathākramam

1.91

अधश्च दूरपातित्वे समे लक्ष्येषु निश्चले दृढस्फोटं प्रकुर्वीत ऊर्ध्वसन्धानयोगतः

adhaśca dūrapātitve same lakṣyeṣu niścale dṛḍhasphoṭaṃ prakurvīta ūrdhvasandhānayogataḥ

1.92

अथ धनुर्व्यायाः कैशिकः केशमूले वै शरः शृङ्गे च सात्त्विकः श्रवणे वत्सकर्णश्च ग्रीवायां भरतो भवेत्

atha dhanurvyāyāḥ kaiśikaḥ keśamūle vai śaraḥ śṛṅge ca sāttvikaḥ śravaṇe vatsakarṇaśca grīvāyāṃ bharato bhavet

1.93

अंसके स्कन्धनामा च व्यायाः पञ्चप्रकीर्त्तिताः कैशिकश्चित्रयुद्धेषु ह्यधो लक्ष्येषु सात्त्विकः

aṃsake skandhanāmā ca vyāyāḥ pañcaprakīrttitāḥ kaiśikaścitrayuddheṣu hyadho lakṣyeṣu sāttvikaḥ

1.94

वत्सकर्णः सदा ज्ञेयो भरतो दृढभेदने दृढभेदे च दूरे च स्कन्धनामानमुद्दिशेत्

vatsakarṇaḥ sadā jñeyo bharato dṛḍhabhedane dṛḍhabhede ca dūre ca skandhanāmānamuddiśet

1.95

अथ लक्ष्यम् लक्ष्यं चतुर्विधं ज्ञेयं स्थिरं चैव चलन्तथा चलाचलं द्वयचलं वेधनीयं क्रमेण तु

atha lakṣyam lakṣyaṃ caturvidhaṃ jñeyaṃ sthiraṃ caiva calantathā calācalaṃ dvayacalaṃ vedhanīyaṃ krameṇa tu

1.96

आत्मानं सुस्थिरं कृत्वा लक्ष्यञ्चैव स्थिरं बुधः वेधयेत् प्रिप्रकारन्तु स्थिरवेधी स उच्यते

ātmānaṃ susthiraṃ kṛtvā lakṣyañcaiva sthiraṃ budhaḥ vedhayet priprakārantu sthiravedhī sa ucyate

1.97

चलन्तु वेधयेद् यस्तु आत्मस्थानेषु संस्थितः चलं लक्ष्यं तु तत् प्रोक्तमाचार्येण शिवेन वै

calantu vedhayed yastu ātmasthāneṣu saṃsthitaḥ calaṃ lakṣyaṃ tu tat proktamācāryeṇa śivena vai

1.98

धन्वीतः चलते यत्र स्थिरलक्ष्ये समाहितः चलाचलं भवेत्तत्र ह्यप्रमेयमाचिन्ततम् उभावपि चलौ यत्र लक्ष्यं चापि धनुर्द्धरः तद्विज्ञेयं द्वयचलं श्रमेण बहु साध्यते

dhanvītaḥ calate yatra sthiralakṣye samāhitaḥ calācalaṃ bhavettatra hyaprameyamācintatam ubhāvapi calau yatra lakṣyaṃ cāpi dhanurddharaḥ tadvijñeyaṃ dvayacalaṃ śrameṇa bahu sādhyate

1.99

श्रमेणास्खलितादृष्टिः शीघ्रसन्धानमाप्यते

śrameṇāskhalitādṛṣṭiḥ śīghrasandhānamāpyate

1.100

श्रमेण चित्रयोधित्वं श्रमेण प्राप्यते जयः तस्माद् गुरुसमक्षं हि श्रमः कार्य्यो विजानता

śrameṇa citrayodhitvaṃ śrameṇa prāpyate jayaḥ tasmād gurusamakṣaṃ hi śramaḥ kāryyo vijānatā

1.101

अथ लक्ष्याभ्यासस्वरूपाणि प्रथमं वामहस्तेन यः श्रमं कुरुते नरः तस्य चापक्रियासिद्धिरचिरादेव जायते

atha lakṣyābhyāsasvarūpāṇi prathamaṃ vāmahastena yaḥ śramaṃ kurute naraḥ tasya cāpakriyāsiddhiracirādeva jāyate

1.102

वामहस्ते सुसंसिद्धे पश्चाद्दक्षिणमारभेत् उभाभ्याञ्च श्रमं कुर्य्यान्नाराचैश्च शरैस्तथा

vāmahaste susaṃsiddhe paścāddakṣiṇamārabhet ubhābhyāñca śramaṃ kuryyānnārācaiśca śaraistathā

1.103

वामेनैव श्रमं कुर्य्यात् सुसिद्धिर्दक्षिने करे विशाखेनासमेनैव रथी व्याये च कैशिके

vāmenaiva śramaṃ kuryyāt susiddhirdakṣine kare viśākhenāsamenaiva rathī vyāye ca kaiśike

1.104

उदिते भास्करे लक्ष्यं पश्चिमायां निवेशयेत् अपराह्ने च कर्त्तव्यं लक्ष्यं पूर्व्वदिगाश्रितम्

udite bhāskare lakṣyaṃ paścimāyāṃ niveśayet aparāhne ca karttavyaṃ lakṣyaṃ pūrvvadigāśritam

1.105

उत्तरेण सदा कार्य्यमवश्यमवरोधिकम् संग्रामेण विना कार्य्यं न लक्ष्यं दक्षिणामुखम्

uttareṇa sadā kāryyamavaśyamavarodhikam saṃgrāmeṇa vinā kāryyaṃ na lakṣyaṃ dakṣiṇāmukham

1.106

षष्टिधन्वन्तरे लक्ष्यं ज्येष्ठं लक्ष्यं प्रकीर्त्तितम् चत्वारिंशत्मध्यमञ्च विंशतिश्च कनिष्ठकम्

ṣaṣṭidhanvantare lakṣyaṃ jyeṣṭhaṃ lakṣyaṃ prakīrttitam catvāriṃśatmadhyamañca viṃśatiśca kaniṣṭhakam

1.107

चत्वारिंशच्च त्रिंशच्च षोडशैव भवेत्ततः

catvāriṃśacca triṃśacca ṣoḍaśaiva bhavettataḥ

1.108

चतुः शतैर्श्च काण्डानां यो हि लक्ष्यं विसर्ज्जयेत् सूर्य्योदये चास्तमने स ज्येष्ठो धन्विनां भवेत्

catuḥ śatairśca kāṇḍānāṃ yo hi lakṣyaṃ visarjjayet sūryyodaye cāstamane sa jyeṣṭho dhanvināṃ bhavet

1.109

त्रिंशतैर्मध्यमश्चैव द्विशताभ्यां कनिष्ठकः लक्ष्यं च पुरुषोन्मानं कुर्य्याच्चन्द्रकसंयुतम्

triṃśatairmadhyamaścaiva dviśatābhyāṃ kaniṣṭhakaḥ lakṣyaṃ ca puruṣonmānaṃ kuryyāccandrakasaṃyutam

1.110

ऊर्द्धभेदी भवेज्ज्येष्ठो नाभिभेदी च मध्यमः पादभेदी तु लक्ष्यस्य स कनिष्ठो मतो भृगो

ūrddhabhedī bhavejjyeṣṭho nābhibhedī ca madhyamaḥ pādabhedī tu lakṣyasya sa kaniṣṭho mato bhṛgo

1.111

अथानध्यायः अष्टमी च ह्यमावास्या वर्जनीया चतुर्द्दशी पूर्णिमार्द्धदिनं यावन्निषिद्धं सर्वकर्म्मसु

athānadhyāyaḥ aṣṭamī ca hyamāvāsyā varjanīyā caturddaśī pūrṇimārddhadinaṃ yāvanniṣiddhaṃ sarvakarmmasu

1.112

अकाले गर्ज्जिते दैवे दुर्द्दिनं चाथवा भवेत् पूर्वकाण्डहतं लक्ष्यमनध्याये प्रचक्षते

akāle garjjite daive durddinaṃ cāthavā bhavet pūrvakāṇḍahataṃ lakṣyamanadhyāye pracakṣate

1.113

अनुराधर्क्षमारभ्य षोडशर्क्षे दिवाकरः यावच्चरति तं कालमकालं हि प्रचक्षते

anurādharkṣamārabhya ṣoḍaśarkṣe divākaraḥ yāvaccarati taṃ kālamakālaṃ hi pracakṣate

1.114

अरुणोदयः वेलायां वारिदो यदि गर्जति तद्दिने स्यादनध्यायस्तमकालं प्रचक्षते

aruṇodayaḥ velāyāṃ vārido yadi garjati taddine syādanadhyāyastamakālaṃ pracakṣate

1.115

श्रमं च कुर्वतस्तत्र भुजङ्गो दृश्यते यदि अथवा भज्यते चापं यदैव श्रमकर्म्मणि

śramaṃ ca kurvatastatra bhujaṅgo dṛśyate yadi athavā bhajyate cāpaṃ yadaiva śramakarmmaṇi

1.116

त्रुट्यते वा गुणो यत्र प्रथमे बाणमोक्षणे श्रमं तत्र न कुर्वीत शस्त्रे मतिमतां वरः

truṭyate vā guṇo yatra prathame bāṇamokṣaṇe śramaṃ tatra na kurvīta śastre matimatāṃ varaḥ

1.117

अथ श्रमक्रिया क्रियाकलापान् वक्ष्यामि श्रमसाध्यांञ्छुचिष्मताम् येषां विज्ञानमात्रेण सिद्धिर्भवति नान्यथा

atha śramakriyā kriyākalāpān vakṣyāmi śramasādhyāṃñchuciṣmatām yeṣāṃ vijñānamātreṇa siddhirbhavati nānyathā

1.118

प्रथमं चापमारोय्य चूलिकां बन्धयेत्ततः स्थानकं तु ततः कृत्वा बाणोपरि करं न्यसेत्

prathamaṃ cāpamāroyya cūlikāṃ bandhayettataḥ sthānakaṃ tu tataḥ kṛtvā bāṇopari karaṃ nyaset

1.119

तोलनं धनुषश्चैव कर्त्तव्यं वामपाणिना आदानञ्च ततः कृत्वा सन्धानञ्च ततः परम्

tolanaṃ dhanuṣaścaiva karttavyaṃ vāmapāṇinā ādānañca tataḥ kṛtvā sandhānañca tataḥ param

1.120

सकृदाकृष्टचापेन भूमिवेधं न कारयेत् नमस्कुर्य्याच्च मां विघ्नराजं गुरुं धनुः शरान्

sakṛdākṛṣṭacāpena bhūmivedhaṃ na kārayet namaskuryyācca māṃ vighnarājaṃ guruṃ dhanuḥ śarān

1.121

याचितव्या गुरोराज्ञा बाणस्याकर्षणं प्रति प्राणवायुं प्रयत्नेन प्राणेन सह पूरयेत्

yācitavyā gurorājñā bāṇasyākarṣaṇaṃ prati prāṇavāyuṃ prayatnena prāṇena saha pūrayet

1.122

कुम्भकेन स्थिरं कृत्वा हुङ्कारेण विसर्जयेत् इत्यभ्यासक्रिया कार्य्या धन्विता सिद्धिमिच्छता

kumbhakena sthiraṃ kṛtvā huṅkāreṇa visarjayet ityabhyāsakriyā kāryyā dhanvitā siddhimicchatā

1.123

षण्मासात् सिध्यते मुष्टिः शराः सम्वत्सरेण तु नाराचास्तस्य सिध्यन्ति यस्य तुष्टो महेश्वरः

ṣaṇmāsāt sidhyate muṣṭiḥ śarāḥ samvatsareṇa tu nārācāstasya sidhyanti yasya tuṣṭo maheśvaraḥ

1.124

पुष्पवद्धारयेद्बाणं सर्पवत् पीडयेद्धनुः धनवच्चिन्तयेल्लक्ष्यं यदीच्छेत् सिद्धिमात्मनः

puṣpavaddhārayedbāṇaṃ sarpavat pīḍayeddhanuḥ dhanavaccintayellakṣyaṃ yadīcchet siddhimātmanaḥ

1.125

क्रियामिच्छन्ति चाचार्य्या दूरमिच्छन्ति भार्गवाः राजानो दृढमिच्छन्ति लक्ष्यमिच्छन्ति चेतरे

kriyāmicchanti cācāryyā dūramicchanti bhārgavāḥ rājāno dṛḍhamicchanti lakṣyamicchanti cetare

1.126

जनानां रञ्जनं येन लक्ष्यपातात् प्रजायते हीनेनापीषुणा तस्मात्प्रशस्तं लक्ष्यवेधनम्

janānāṃ rañjanaṃ yena lakṣyapātāt prajāyate hīnenāpīṣuṇā tasmātpraśastaṃ lakṣyavedhanam

1.127

अथ लक्ष्यस्खलनविधिः विशाखस्थानकं हित्वा समसन्धानमाचरेत् गोपुच्छमुख बाणेन सिंहकर्णेन मुष्टिना

atha lakṣyaskhalanavidhiḥ viśākhasthānakaṃ hitvā samasandhānamācaret gopucchamukha bāṇena siṃhakarṇena muṣṭinā

1.128

आकर्षेत् केशिकव्याये न शिखाश्चालयेत्ततः पूर्वापरौ समं कार्य्यौ समांसौ निश्चलौ करौ

ākarṣet keśikavyāye na śikhāścālayettataḥ pūrvāparau samaṃ kāryyau samāṃsau niścalau karau

1.129

चक्षुषी स्पन्दयेन्नैव दृष्टिं लक्ष्ये नियोजयेत् मुष्टिनाच्छादितं लक्ष्यं शरस्याग्रे नियोजयेत्

cakṣuṣī spandayennaiva dṛṣṭiṃ lakṣye niyojayet muṣṭinācchāditaṃ lakṣyaṃ śarasyāgre niyojayet

1.130

मनो दृष्टिगतं कृत्वा ततः काण्डं विसर्ज्जयेत् स्खलत्येव कदाचिन्न लक्ष्ये योद्धा जितश्रमः

mano dṛṣṭigataṃ kṛtvā tataḥ kāṇḍaṃ visarjjayet skhalatyeva kadācinna lakṣye yoddhā jitaśramaḥ

1.131

अथ शीघ्र सन्धानम् आदानं चैव तूणीरात् सन्धानं कर्षणं तथा क्षेपणं च त्वरा युक्तो बाणस्य कुरुते तुयः

atha śīghra sandhānam ādānaṃ caiva tūṇīrāt sandhānaṃ karṣaṇaṃ tathā kṣepaṇaṃ ca tvarā yukto bāṇasya kurute tuyaḥ

1.132

नित्याभ्यास वशात्तस्य शीघ्रसन्धानता भवेत् अथ दूरपातित्वं मठ्या पताकया बाणं स्त्रीचिह्वं दूरपातनम् दृढभेदनम् प्रत्यालीढे कृते स्थाने ह्यधः सन्धानमाचरेत् दर्दूरस्थानमास्थाय ह्यूर्द्धधारणमाचरेत्

nityābhyāsa vaśāttasya śīghrasandhānatā bhavet atha dūrapātitvaṃ maṭhyā patākayā bāṇaṃ strīcihvaṃ dūrapātanam dṛḍhabhedanam pratyālīḍhe kṛte sthāne hyadhaḥ sandhānamācaret dardūrasthānamāsthāya hyūrddhadhāraṇamācaret

1.133

स्कन्ध व्यायेन वज्रस्य मुष्ट्यापुमार्गणेन च अत्यन्त सौष्ठवं वाह्वोर्जायते दृढभेदिता

skandha vyāyena vajrasya muṣṭyāpumārgaṇena ca atyanta sauṣṭhavaṃ vāhvorjāyate dṛḍhabheditā

1.134

हीनगतिसमूहः सूचीमुखा मीनपुच्छा भ्रमरी च तृतीयका शराणां गतयस्त्रिस्रः प्रशस्ता कथिता बुधैः

hīnagatisamūhaḥ sūcīmukhā mīnapucchā bhramarī ca tṛtīyakā śarāṇāṃ gatayastrisraḥ praśastā kathitā budhaiḥ

1.135

सूचीमुखा गतिस्तस्य सायकस्य प्रजायते पत्रं विलोकितं यस्य ह्यथवा हीनपत्रकम्

sūcīmukhā gatistasya sāyakasya prajāyate patraṃ vilokitaṃ yasya hyathavā hīnapatrakam

1.136

कर्कशस्तन्तु चापेन यः कृष्टो हीनमुष्टिना मत्स्यपुच्छा गतिस्तस्य सायकस्य प्रकीर्त्तिता

karkaśastantu cāpena yaḥ kṛṣṭo hīnamuṣṭinā matsyapucchā gatistasya sāyakasya prakīrttitā

1.137

भ्रमरी कथिता ह्येषा शिवेन श्रमकर्म्मणि ऋजुत्वेन विना याति क्षिप्यमाणस्तु सायकः

bhramarī kathitā hyeṣā śivena śramakarmmaṇi ṛjutvena vinā yāti kṣipyamāṇastu sāyakaḥ

1.138

बाणलक्ष्यस्खलनगतिसमूहः वामगा दक्षिणा चैव ऊर्द्ध्वगाधोगमा तथा चतस्रो गतयः प्रोक्ता बाणस्खलनहेतवः

bāṇalakṣyaskhalanagatisamūhaḥ vāmagā dakṣiṇā caiva ūrddhvagādhogamā tathā catasro gatayaḥ proktā bāṇaskhalanahetavaḥ

1.139

पूर्वोक्त गतिसमूहोदाहरणम् कम्पते गुणमुष्टिस्तु मार्गणस्य तु पृष्ठतः सन्मुखोस्याद्धनुर्मुष्टिस्तदा वामे गतिर्भवेत्

pūrvokta gatisamūhodāharaṇam kampate guṇamuṣṭistu mārgaṇasya tu pṛṣṭhataḥ sanmukhosyāddhanurmuṣṭistadā vāme gatirbhavet

1.140

ग्रहणं शिथिलं यस्य ऋजुत्वेन विवर्जितम् पार्श्वन्तु दक्षिणं याति सायकस्य न संशयः

grahaṇaṃ śithilaṃ yasya ṛjutvena vivarjitam pārśvantu dakṣiṇaṃ yāti sāyakasya na saṃśayaḥ

1.141

ऊर्द्ध्वं भवेच्चापमुष्टिर्गुणमुष्टिरधो भवेत् समुक्तो मार्गणो लक्ष्यादूर्द्ध्वं याति न संशयः

ūrddhvaṃ bhaveccāpamuṣṭirguṇamuṣṭiradho bhavet samukto mārgaṇo lakṣyādūrddhvaṃ yāti na saṃśayaḥ

1.142

मोक्षणे चैव बाणस्य चापमुष्टिरधो भवेत् गुणमुष्टिर्भवेदूर्द्ध्वं तदाधोगामिनी गतिः

mokṣaṇe caiva bāṇasya cāpamuṣṭiradho bhavet guṇamuṣṭirbhavedūrddhvaṃ tadādhogāminī gatiḥ

1.143

अथ शुद्धगतयः लक्ष्यबाणाग्रदृष्टिनां सङ्गतिस्तु यदा भवेत् तदानीं मुञ्चितो बाणो लक्ष्यान्न स्खलति ध्रुवम्

atha śuddhagatayaḥ lakṣyabāṇāgradṛṣṭināṃ saṅgatistu yadā bhavet tadānīṃ muñcito bāṇo lakṣyānna skhalati dhruvam

1.144

निर्दोषः शब्दहीनश्च सममुष्टिद्वयोऽङ्कितः भिनक्ति दृढभेद्यानि सायको नास्ति संशयः

nirdoṣaḥ śabdahīnaśca samamuṣṭidvayo'ṅkitaḥ bhinakti dṛḍhabhedyāni sāyako nāsti saṃśayaḥ

1.145

स्वाकृष्टस्तेजितोयश्च सुशुद्धो गाढमुष्टितः नरनागाश्व कायेषु न तिष्ठति स मार्गणः

svākṛṣṭastejitoyaśca suśuddho gāḍhamuṣṭitaḥ naranāgāśva kāyeṣu na tiṣṭhati sa mārgaṇaḥ

1.146

यस्य तृणसमा बाणाः यस्येन्धनसमं धनुः यस्य प्राणसमा मौर्वी स धन्वी धन्विनां वरः

yasya tṛṇasamā bāṇāḥ yasyendhanasamaṃ dhanuḥ yasya prāṇasamā maurvī sa dhanvī dhanvināṃ varaḥ

1.147

अथ दृढचतुष्कम् अयश्चर्म्मघटश्चैव मृतपिण्डश्च चतुष्ट्यम् यो भिनत्ति न तस्येषुर्वज्रेणापि विदीर्यते

atha dṛḍhacatuṣkam ayaścarmmaghaṭaścaiva mṛtapiṇḍaśca catuṣṭyam yo bhinatti na tasyeṣurvajreṇāpi vidīryate

1.148

सार्द्धाङ्गुलप्रमाणेन लोहपत्राणि कारयेत् तानि भित्त्वैकबाणेन दृढघाती भवेन्नरः

sārddhāṅgulapramāṇena lohapatrāṇi kārayet tāni bhittvaikabāṇena dṛḍhaghātī bhavennaraḥ

1.149

चतुर्विंशति चर्म्माणि यो भिनत्तीषुणा नरः तस्य बाणो गजेन्द्रस्य कायं निर्भिद्य गच्छति

caturviṃśati carmmāṇi yo bhinattīṣuṇā naraḥ tasya bāṇo gajendrasya kāyaṃ nirbhidya gacchati

1.150

भ्राम्यन् जले घटो वेध्यश्चक्रे मृत्पिण्डकं तथा भ्रमन्ति वेधयेद्यो हि दृढ भेदी स उच्यते

bhrāmyan jale ghaṭo vedhyaścakre mṛtpiṇḍakaṃ tathā bhramanti vedhayedyo hi dṛḍha bhedī sa ucyate

1.151

अयस्तु काकतुण्डेन चर्म्मचारामुखेन हि मृतपिण्डं च घटं चैव विध्येत् सूचीमुखेन वै

ayastu kākatuṇḍena carmmacārāmukhena hi mṛtapiṇḍaṃ ca ghaṭaṃ caiva vidhyet sūcīmukhena vai

1.152

बाणभङ्गकरावर्त्तः काष्ठच्छेदनमेव च बिन्दुकं गोलकयुग्मं यो वेत्ति स जयी भवेत्

bāṇabhaṅgakarāvarttaḥ kāṣṭhacchedanameva ca bindukaṃ golakayugmaṃ yo vetti sa jayī bhavet

1.153

लक्ष्य स्थाने धृतं कान्तं सम्मुखं छेदयेत्ततः किञ्चिद् मुष्टिं विधाय स्वां तिर्य्यग् द्विफलकेषुणा

lakṣya sthāne dhṛtaṃ kāntaṃ sammukhaṃ chedayettataḥ kiñcid muṣṭiṃ vidhāya svāṃ tiryyag dviphalakeṣuṇā

1.154

सम्मुखं बाणमायान्तं तिर्य्यग् बाणं न सञ्चरेत् प्राज्ञः शरेण यश्छिन्द्याद्बाणच्छेदी स उच्यते

sammukhaṃ bāṇamāyāntaṃ tiryyag bāṇaṃ na sañcaret prājñaḥ śareṇa yaśchindyādbāṇacchedī sa ucyate

1.155

अथ काष्ठछेदनम् काष्ठेऽश्वकेशं संयम्य तत्र बध्वा वराटिकाम् हस्तेन भ्राम्यमाणं च यो हन्ति सो धनुर्धरः

atha kāṣṭhachedanam kāṣṭhe'śvakeśaṃ saṃyamya tatra badhvā varāṭikām hastena bhrāmyamāṇaṃ ca yo hanti so dhanurdharaḥ

1.156

लक्ष्य स्थानेन्यसेत् काष्ठं सार्द्रं गोपुच्छसन्निभम् यश्छिन्द्यात्तत् क्षरप्रेण काष्ठच्छेदी स जायते

lakṣya sthānenyaset kāṣṭhaṃ sārdraṃ gopucchasannibham yaśchindyāttat kṣarapreṇa kāṣṭhacchedī sa jāyate

1.157

लक्ष्ये बिन्दुं न्यसेच्छुभ्रं शुभ्रबन्धूकपुष्पवत् हन्ति तं बिन्दुकं यस्तु चित्रयोधा स उच्यते

lakṣye binduṃ nyasecchubhraṃ śubhrabandhūkapuṣpavat hanti taṃ bindukaṃ yastu citrayodhā sa ucyate

1.158

काष्ठगोलयुगं क्षिप्रं दूरमूर्द्धं पुरा स्थितैः असम्प्राप्तं शरं पृष्ठे तद्गोपुच्छमुखेन हि

kāṣṭhagolayugaṃ kṣipraṃ dūramūrddhaṃ purā sthitaiḥ asamprāptaṃ śaraṃ pṛṣṭhe tadgopucchamukhena hi

1.159

यो हन्ति शरयुग्मेन शीघ्रसन्धान योगतः स स्याद्धनुर्भृतां श्रेष्ठः पूजितः सर्वपार्थिवैः

yo hanti śarayugmena śīghrasandhāna yogataḥ sa syāddhanurbhṛtāṃ śreṣṭhaḥ pūjitaḥ sarvapārthivaiḥ

1.160

अथ धावल्लक्ष्यम् रथस्थेन गजस्थेन हयस्थेन च पत्तिना धावता वै श्रमः कार्य्यो लक्ष्यं हन्तुं सुनिश्चितम्

atha dhāvallakṣyam rathasthena gajasthena hayasthena ca pattinā dhāvatā vai śramaḥ kāryyo lakṣyaṃ hantuṃ suniścitam

1.161

अथ विधिः वामादायाति यल्लक्ष्यं दक्षिणं हि प्रधावति तच्छिन्द्याच्चापमाकृष्य सव्येनैव च पाणिना

atha vidhiḥ vāmādāyāti yallakṣyaṃ dakṣiṇaṃ hi pradhāvati tacchindyāccāpamākṛṣya savyenaiva ca pāṇinā

1.162

तथैव दक्षिणायान्तं विध्येद्बाणाद्धनुर्धरः आलीढक्रममारोप्य त्वरा हन्याच्च तं नरः

tathaiva dakṣiṇāyāntaṃ vidhyedbāṇāddhanurdharaḥ ālīḍhakramamāropya tvarā hanyācca taṃ naraḥ

1.163

वायोरपि बलं दृष्ट्वा वामदक्षिणवाहतः लक्ष्यं संसाधयेदेवं गाधिपुत्र नृपात्मज

vāyorapi balaṃ dṛṣṭvā vāmadakṣiṇavāhataḥ lakṣyaṃ saṃsādhayedevaṃ gādhiputra nṛpātmaja

1.164

वायुः पृष्ठे दक्षिणे च वहन् सूचयते बलम् सन्मुखीनश्च वामश्च भटानां भङ्गसूचकः

vāyuḥ pṛṣṭhe dakṣiṇe ca vahan sūcayate balam sanmukhīnaśca vāmaśca bhaṭānāṃ bhaṅgasūcakaḥ

1.165

अथ शब्दवेधित्वम् लक्ष्यस्थाने न्यसेत् कांस्यपात्रं हस्तद्वयान्तरे ताडयेच्छर्कराभिस्तच्छब्दः सञ्जायते यदा

atha śabdavedhitvam lakṣyasthāne nyaset kāṃsyapātraṃ hastadvayāntare tāḍayeccharkarābhistacchabdaḥ sañjāyate yadā

1.166

यत्र चैवोद्यते शब्दस्तं सम्यक् तत्र चिन्तयेत् कर्णेन्द्रियमनोयोगाल्लक्ष्यं निश्चयतां नयेत्

yatra caivodyate śabdastaṃ samyak tatra cintayet karṇendriyamanoyogāllakṣyaṃ niścayatāṃ nayet

1.167

पुनः शर्करया तच्च ताडयेच्छब्दहेतवे पुनर्निश्चयतां नेयं शब्दस्थानानुसारतः

punaḥ śarkarayā tacca tāḍayecchabdahetave punarniścayatāṃ neyaṃ śabdasthānānusārataḥ

1.168

ततः किञ्चित् कृतं दूरं नित्यं नित्यं विधानतः लक्ष्यं समभ्यसेद् ध्वान्ते शब्दवेधनहेतवे

tataḥ kiñcit kṛtaṃ dūraṃ nityaṃ nityaṃ vidhānataḥ lakṣyaṃ samabhyased dhvānte śabdavedhanahetave

1.169

ततो बाणेन हन्यात्तदवधानेन तीक्ष्णधीः एतच्च दुष्करं कर्म्म भाग्ये कस्यापि सिद्ध्यति

tato bāṇena hanyāttadavadhānena tīkṣṇadhīḥ etacca duṣkaraṃ karmma bhāgye kasyāpi siddhyati

1.170

अथ प्रत्यागमनम् खगं बाणन्तु राजेन्द्र प्रक्षिपेद्वायुसन्मुखे रञ्जकस्य च नालाभिरतोह्यागमनं भवेत्

atha pratyāgamanam khagaṃ bāṇantu rājendra prakṣipedvāyusanmukhe rañjakasya ca nālābhiratohyāgamanaṃ bhavet

1.171

एवं श्रमविधिं कुर्य्याद्यावद् सिद्धिः प्रजायते श्रमे सिद्धे च वर्षासु नैव ग्राह्यं धनुष्करे

evaṃ śramavidhiṃ kuryyādyāvad siddhiḥ prajāyate śrame siddhe ca varṣāsu naiva grāhyaṃ dhanuṣkare

1.172

पूर्वाभ्यासस्य शास्त्राणामविस्मरणहेतवे मासद्वयं श्रमं कुर्य्यात् प्रतिवर्षं शरदृतौ

pūrvābhyāsasya śāstrāṇāmavismaraṇahetave māsadvayaṃ śramaṃ kuryyāt prativarṣaṃ śaradṛtau

1.173

जाते वाश्व युजिमासे नवमी देवतादिने पूजयेदीश्वरीं चण्डीं गुरुं शास्त्राणि वाजिनः

jāte vāśva yujimāse navamī devatādine pūjayedīśvarīṃ caṇḍīṃ guruṃ śāstrāṇi vājinaḥ

1.174

विप्रेभ्यो दक्षिणां दत्वा कुमारीभोजयेत्ततः देव्यै पशुबलिं दद्याद् भृतोवादित्रमङ्गलैः

viprebhyo dakṣiṇāṃ datvā kumārībhojayettataḥ devyai paśubaliṃ dadyād bhṛtovāditramaṅgalaiḥ

1.175

ततस्तु साधयेन्मन्त्रान् वेदोक्तान् आगमोदितान् अस्त्राणां कर्म्मसिद्ध्यर्थं जपहोम विधानतः

tatastu sādhayenmantrān vedoktān āgamoditān astrāṇāṃ karmmasiddhyarthaṃ japahoma vidhānataḥ

1.176

ब्राह्मं नारायणं शैवमैन्द्रं वायव्यवारुणे आग्नेयं चापरास्त्राणि गुरुदत्तानि साधयेत्

brāhmaṃ nārāyaṇaṃ śaivamaindraṃ vāyavyavāruṇe āgneyaṃ cāparāstrāṇi gurudattāni sādhayet

1.177

मनोवाक्कर्म्मभिर्भाव्यं लब्धास्त्रेण शुचिष्मता अपात्रमसमर्थञ्च दहन्त्यस्त्राणि पूरुषम्

manovākkarmmabhirbhāvyaṃ labdhāstreṇa śuciṣmatā apātramasamarthañca dahantyastrāṇi pūruṣam

1.178

प्रयोगं चोपसंहारं यो वेत्ति स धनुर्द्धरः सामान्ये कर्म्मणि प्राज्ञो नैवास्त्राणि प्रयोजयेत्

prayogaṃ copasaṃhāraṃ yo vetti sa dhanurddharaḥ sāmānye karmmaṇi prājño naivāstrāṇi prayojayet

1.179

अथास्त्राणि अथास्त्राणि प्रवक्ष्यामि सावधानोऽवधारय ब्रह्मास्त्रं प्रथमं प्रोक्तं द्वितीयं ब्रह्मदण्डकम्

athāstrāṇi athāstrāṇi pravakṣyāmi sāvadhāno'vadhāraya brahmāstraṃ prathamaṃ proktaṃ dvitīyaṃ brahmadaṇḍakam

1.180

ब्रह्मशिरस्तृतीयञ्च तुर्य्यं पाशुपतं मतम् वायव्यं पञ्चमं प्रोक्तमाग्नेयं षष्ठकं स्मृतम्

brahmaśirastṛtīyañca turyyaṃ pāśupataṃ matam vāyavyaṃ pañcamaṃ proktamāgneyaṃ ṣaṣṭhakaṃ smṛtam

1.181

नरसिंहं सप्तमञ्च तेषां भेदाह्यनन्तकाः ससंहारं सविज्ञेयं शृणु गाधे यथातथम्

narasiṃhaṃ saptamañca teṣāṃ bhedāhyanantakāḥ sasaṃhāraṃ savijñeyaṃ śṛṇu gādhe yathātatham

1.182

वेदमात्रा सर्वशास्त्रं गृह्यते दोप्यतेऽथवा तत्प्रयोगं शृणु प्राज्ञ ब्रह्मास्त्रं प्रथमं शृणु

vedamātrā sarvaśāstraṃ gṛhyate dopyate'thavā tatprayogaṃ śṛṇu prājña brahmāstraṃ prathamaṃ śṛṇu

श्रीमहर्षिवसिष्ठ प्रणीता धनुर्वेद संहिता (cont. 2)

1.183

दादिदान्ताञ्च सावित्रीं विपरीतां जपेत् सुधीः जप्त्वा पूर्वां निखर्वञ्च त्वभिमन्त्रय विधिवच्छरम् क्षिपेच्छत्रुषु सहसा नश्यन्ति सर्वजातयः बाला वृद्धाश्च गर्भस्था ये च योद्धुं समागताः

dādidāntāñca sāvitrīṃ viparītāṃ japet sudhīḥ japtvā pūrvāṃ nikharvañca tvabhimantraya vidhivaccharam kṣipecchatruṣu sahasā naśyanti sarvajātayaḥ bālā vṛddhāśca garbhasthā ye ca yoddhuṃ samāgatāḥ

1.184

सर्वे ते नाशभायन्ति मम चैव प्रसादतः यथातथं दादिदान्तं जपेत् संहारसिद्धये

sarve te nāśabhāyanti mama caiva prasādataḥ yathātathaṃ dādidāntaṃ japet saṃhārasiddhaye

1.185

ब्रह्मदण्डं प्रवक्ष्यामि प्रणवं पूर्वमुच्चरेत् ततः प्रचोदयाज्ज्ञेयं ततो नो यो धियः क्रमात् ततो धीमहि देवस्य ततो भर्गो वरेण्यम् सवितुस्तच्च योक्तव्यममुकशत्रुं तथैव च

brahmadaṇḍaṃ pravakṣyāmi praṇavaṃ pūrvamuccaret tataḥ pracodayājjñeyaṃ tato no yo dhiyaḥ kramāt tato dhīmahi devasya tato bhargo vareṇyam savitustacca yoktavyamamukaśatruṃ tathaiva ca

1.186

ततो हन हन हुं फट् जप्त्वा पूर्वं द्विलक्षयकम् अभिमन्त्र्य शरं तद्वत् प्रक्षिपेच्छत्रुषु स्फुटम्

tato hana hana huṃ phaṭ japtvā pūrvaṃ dvilakṣayakam abhimantrya śaraṃ tadvat prakṣipecchatruṣu sphuṭam

1.187

नश्यन्ति शत्रवः सर्वे यमतुल्या अपि ध्रुवम् एतदेव विपर्य्यस्तं जपेत् संहारसिद्धये

naśyanti śatravaḥ sarve yamatulyā api dhruvam etadeva viparyyastaṃ japet saṃhārasiddhaye

1.188

ब्रह्मशिरः प्रवक्ष्यामि प्रणवं पूर्वमुच्चरेत् धियो यो नः प्रचोदयात् भर्गो देवस्य धीमहि तत्सवितुर्वरेण्यम् शत्रून्मे हन हनेति च

brahmaśiraḥ pravakṣyāmi praṇavaṃ pūrvamuccaret dhiyo yo naḥ pracodayāt bhargo devasya dhīmahi tatsaviturvareṇyam śatrūnme hana haneti ca

1.189

हूं फट् चैवप्रयोक्तव्यं क्षिपेद् ब्रह्मशिरस्तः पुरश्चर्य्यां पुरस्कृत्वा त्रिलक्ष्यं नियतः शुचिः

hūṃ phaṭ caivaprayoktavyaṃ kṣiped brahmaśirastaḥ puraścaryyāṃ puraskṛtvā trilakṣyaṃ niyataḥ śuciḥ

1.190

नश्यन्ति सर्वे रिपवः सर्वे देवासुरा अपि इदमेव प्रयोक्तव्यः विपर्य्यस्तं विकर्षणे

naśyanti sarve ripavaḥ sarve devāsurā api idameva prayoktavyaḥ viparyyastaṃ vikarṣaṇe

1.191

पाशुपतास्त्रम् अतः परं प्रवक्ष्यामि चास्त्रं पाशुपतन्तव यस्य विज्ञानमात्रेण नश्यन्ति सर्वशत्रवः

pāśupatāstram ataḥ paraṃ pravakṣyāmi cāstraṃ pāśupatantava yasya vijñānamātreṇa naśyanti sarvaśatravaḥ

1.192

दादिदान्तां च सावित्रीं प्रोच्य प्रणवमेव च श्लीं पशुं हुं फट् अमुकशत्रून् हन हन हुं फट्

dādidāntāṃ ca sāvitrīṃ procya praṇavameva ca ślīṃ paśuṃ huṃ phaṭ amukaśatrūn hana hana huṃ phaṭ

1.193

जप्त्वा पूर्व्वं द्विलक्षञ्च ततः पाशुपतं क्षिपेत् पुनस्तदेव व्यस्तं स्यात् संहारे तां नियोजयेत् एतत् पाशुपतं चास्त्रं सर्वशत्रुनिवारणम्

japtvā pūrvvaṃ dvilakṣañca tataḥ pāśupataṃ kṣipet punastadeva vyastaṃ syāt saṃhāre tāṃ niyojayet etat pāśupataṃ cāstraṃ sarvaśatrunivāraṇam

1.194

वच्मि वायव्यमस्त्रं ते येन नश्यन्ति शत्रवः ॐ वायव्यया या वायव्ययान्योर्वाय या वा तथा अमुकशत्रूम् हन हन हूं फट् चैव प्रकीर्त्तयेत् पूर्व्वमेव तथा जप्त्वा नियुतं द्वितयन्तथा

vacmi vāyavyamastraṃ te yena naśyanti śatravaḥ ॐ vāyavyayā yā vāyavyayānyorvāya yā vā tathā amukaśatrūm hana hana hūṃ phaṭ caiva prakīrttayet pūrvvameva tathā japtvā niyutaṃ dvitayantathā

1.195

पुनः संहाररूपेण संहारं च प्रकल्पयेत् अस्त्रं वायव्यकं नाम देवानामपि वारणम्

punaḥ saṃhārarūpeṇa saṃhāraṃ ca prakalpayet astraṃ vāyavyakaṃ nāma devānāmapi vāraṇam

1.196

आग्नेयं संप्रवक्ष्यामि यतः परभयं दहेत् ओमग्निस्त्यता हृदञ्च शिवं वनाश्वाविणि च हगादशरूपनः सद वे ति ततः क्रमात् हादति तोयति राम तथा मसो हित्वा वान्

āgneyaṃ saṃpravakṣyāmi yataḥ parabhayaṃ dahet omagnistyatā hṛdañca śivaṃ vanāśvāviṇi ca hagādaśarūpanaḥ sada ve ti tataḥ kramāt hādati toyati rāma tathā maso hitvā vān

1.197

सुसेदवेदया च वदेत् अमुकादीं स्ततो वदेत् पूर्वोक्तांश्च पुरश्चर्य्यां कृत्वा शस्त्रेभियोजयेत् इमं मन्त्रं पुनर्व्यस्तं संहारे चैव योजयेत्

susedavedayā ca vadet amukādīṃ stato vadet pūrvoktāṃśca puraścaryyāṃ kṛtvā śastrebhiyojayet imaṃ mantraṃ punarvyastaṃ saṃhāre caiva yojayet

1.198

ॐ वज्रनखवज्रदंष्ट्रायुधाय महासिंहाय हुं फट् पूर्वं जप्त्वा च लक्षं हि नरसिंहञ्च योजयेत् सिंहरूपास्ततो बाणा पतन्ति शात्रवे वने

ॐ vajranakhavajradaṃṣṭrāyudhāya mahāsiṃhāya huṃ phaṭ pūrvaṃ japtvā ca lakṣaṃ hi narasiṃhañca yojayet siṃharūpāstato bāṇā patanti śātrave vane

1.199

पूर्वोक्तेन प्रकारेण संहारञ्च प्रकल्पयेत् संक्षेपतो महाभाग तवोक्तानि महामते भेदास्तेषां शिवेनैव ह्यनन्ताः परिकीर्त्तिताः

pūrvoktena prakāreṇa saṃhārañca prakalpayet saṃkṣepato mahābhāga tavoktāni mahāmate bhedāsteṣāṃ śivenaiva hyanantāḥ parikīrttitāḥ

2.1

इत्यस्त्रप्रकरणम् अथौषधिः हस्तार्के लाङ्गली कन्दो गृहीतस्तस्य लेपतः शूरस्यापि रणे पुंसो दर्पं हरति कातरः

ityastraprakaraṇam athauṣadhiḥ hastārke lāṅgalī kando gṛhītastasya lepataḥ śūrasyāpi raṇe puṃso darpaṃ harati kātaraḥ

2.2

गृहीत्वा योगनक्षत्रैरपामार्गस्य मूलकम् लेपमात्रेण वीराणां सर्वशस्त्रनिवारणम्

gṛhītvā yoganakṣatrairapāmārgasya mūlakam lepamātreṇa vīrāṇāṃ sarvaśastranivāraṇam

2.3

अधः पुष्पी शङ्खपुष्पी लज्जालुर्गिरिकर्णिका नलिनी सहदेवी च पत्रमोञ्जार्कयोस्तथा

adhaḥ puṣpī śaṅkhapuṣpī lajjālurgirikarṇikā nalinī sahadevī ca patramoñjārkayostathā

2.4

विष्णुकान्ता च सर्वासां जटा ग्राह्या रवेर्दिने बद्धा भुजे विलेपाद्वा काये शस्त्रापवारकाः

viṣṇukāntā ca sarvāsāṃ jaṭā grāhyā raverdine baddhā bhuje vilepādvā kāye śastrāpavārakāḥ

2.5

सर्पव्याघ्रादिसत्त्वानां भूतादीनां न जायते भीतिस्तस्य स्थिता यस्य मातरोऽष्टौ शरीरके

sarpavyāghrādisattvānāṃ bhūtādīnāṃ na jāyate bhītistasya sthitā yasya mātaro'ṣṭau śarīrake

2.6

गृहीतं हस्तनक्षत्रे चूर्णं छुच्छुन्दरी भवम् तत्प्रभावाद्गजः पुंसः सम्मुखं नैति निश्चितम्

gṛhītaṃ hastanakṣatre cūrṇaṃ chucchundarī bhavam tatprabhāvādgajaḥ puṃsaḥ sammukhaṃ naiti niścitam

2.7

हरिमांसं गृहीत्वा च मार्गेऽश्वानां क्षिपेद्भुवि तेन मार्गेण ते चाश्वा नायान्ति ताडनेन वै

harimāṃsaṃ gṛhītvā ca mārge'śvānāṃ kṣipedbhuvi tena mārgeṇa te cāśvā nāyānti tāḍanena vai

2.8

छुच्छुन्दरीश्रीफलपुष्पचूर्णैरालिप्तगात्रस्य नरस्य दूरात् आघ्राय गन्धं द्विरदोऽतिमत्तोमदं त्यजेत् केसरिणो यथोग्रम्

chucchundarīśrīphalapuṣpacūrṇairāliptagātrasya narasya dūrāt āghrāya gandhaṃ dvirado'timattomadaṃ tyajet kesariṇo yathogram

2.9

श्वेताद्रिकर्णिका मूलं पाणिस्थं वारयेद्गजम् श्वेतकण्टारिकामूलं व्याघ्रादीनां भयं हरेत्

śvetādrikarṇikā mūlaṃ pāṇisthaṃ vārayedgajam śvetakaṇṭārikāmūlaṃ vyāghrādīnāṃ bhayaṃ haret

2.10

पुष्यार्कोत्पाटिते मूले पाठायाः मुखसंस्थिते देहं स्फुरति नो तीक्ष्णमण्डलाग्रै रणे नृणाम्

puṣyārkotpāṭite mūle pāṭhāyāḥ mukhasaṃsthite dehaṃ sphurati no tīkṣṇamaṇḍalāgrai raṇe nṛṇām

2.11

गान्धार्य्या उत्तरं मूलं मुखस्थं सन्मुखागतम् शस्त्रौधं वारयेत्तत्र पुष्यार्के विधिनोद्धृतम्

gāndhāryyā uttaraṃ mūlaṃ mukhasthaṃ sanmukhāgatam śastraudhaṃ vārayettatra puṣyārke vidhinoddhṛtam

2.12

अथ विधिरूपवासः शुभ्रायाः परपुङ्खाया जटनीली जटाथवा भुजे शिरसि वक्त्रे वा स्थिता शस्त्रनिवारिका भूपाहिचोरभीतिघ्नी गृहीता पुष्यभास्करे

atha vidhirūpavāsaḥ śubhrāyāḥ parapuṅkhāyā jaṭanīlī jaṭāthavā bhuje śirasi vaktre vā sthitā śastranivārikā bhūpāhicorabhītighnī gṛhītā puṣyabhāskare

2.13

अथ संग्रामविधिः आदौ तु क्रियते मुद्रा पश्चाद्युद्धं समाचरेत् सर्पमुद्रा कृता येन तस्य सिद्धिर्न संशयः

atha saṃgrāmavidhiḥ ādau tu kriyate mudrā paścādyuddhaṃ samācaret sarpamudrā kṛtā yena tasya siddhirna saṃśayaḥ

2.14

श्री रुद्रं ध्यात्वा तन्मन्त्रं जपेत् ॐ नमः परमात्मने सर्वशक्तिमते विरूपाक्षाय भालनेत्राय रं हुं फट् स्वाहा । ततो हैमवतीं ध्यात्वा प्रणम्य युद्धमारभेत् । ॐ ह्रीं श्रीं हैमवतीश्वरीं ह्रीं स्वाहा । ॐ ह्रीं वज्रयोगिन्यै स्वाहा । सिंहासनस्थां रुद्राणीं ध्यायेत्

śrī rudraṃ dhyātvā tanmantraṃ japet ॐ namaḥ paramātmane sarvaśaktimate virūpākṣāya bhālanetrāya raṃ huṃ phaṭ svāhā | tato haimavatīṃ dhyātvā praṇamya yuddhamārabhet | ॐ hrīṃ śrīṃ haimavatīśvarīṃ hrīṃ svāhā | ॐ hrīṃ vajrayoginyai svāhā | siṃhāsanasthāṃ rudrāṇīṃ dhyāyet

2.15

अपूर्ण शत्रुसामग्री पूर्णे वै स्वबलन्तथा कुरुते पूर्णसत्वस्थो जयत्येको वसुन्धराम्

apūrṇa śatrusāmagrī pūrṇe vai svabalantathā kurute pūrṇasatvastho jayatyeko vasundharām

2.16

पृष्ठे दक्षे योगिनी राहुयुक्ता यस्यैकोऽयं शत्रुलक्षं निहन्ति अर्कः पृष्ठे दक्षिणे यस्य गाधे चन्द्रे वामे सन्मुखे वै निशायाम् वायु पृष्ठे दक्षिणे यो विदध्यात् योधा शत्रून्नाशयेद्दक्षिणेन

pṛṣṭhe dakṣe yoginī rāhuyuktā yasyaiko'yaṃ śatrulakṣaṃ nihanti arkaḥ pṛṣṭhe dakṣiṇe yasya gādhe candre vāme sanmukhe vai niśāyām vāyu pṛṣṭhe dakṣiṇe yo vidadhyāt yodhā śatrūnnāśayeddakṣiṇena

2.17

या नाडी वहते चाङ्गे तस्यामेवाधिदेवता सन्मुखेऽपि दिशा तेषां सर्वकार्य्यफलप्रदा

yā nāḍī vahate cāṅge tasyāmevādhidevatā sanmukhe'pi diśā teṣāṃ sarvakāryyaphalapradā

2.18

यां दिशं वहते वायुर्युद्धं तद्दिशि दापयेत् जयत्येव न सन्देहः शक्रोऽपि यदि चाग्रतः

yāṃ diśaṃ vahate vāyuryuddhaṃ taddiśi dāpayet jayatyeva na sandehaḥ śakro'pi yadi cāgrataḥ

2.19

सूर्य्ये पूर्वे चोत्तरे च चन्द्रे पश्चिमदक्षिणं सेनापतिबलं त्वेवं प्रेषयेन्नित्यमादरात्

sūryye pūrve cottare ca candre paścimadakṣiṇaṃ senāpatibalaṃ tvevaṃ preṣayennityamādarāt

2.20

यत्र नाड्या वहेद् वायुस्तदङ्गे प्राणमेव च आकृष्य गच्छेत् कर्णान्तं जयत्येव पुरन्दरम्

yatra nāḍyā vahed vāyustadaṅge prāṇameva ca ākṛṣya gacchet karṇāntaṃ jayatyeva purandaram

2.21

प्रतिपक्षप्रहारेभ्यः पूर्णाङ्गं योऽभिरक्षति न तस्य रिपुभिः शक्तिर्बलिष्ठैरपि हन्यते

pratipakṣaprahārebhyaḥ pūrṇāṅgaṃ yo'bhirakṣati na tasya ripubhiḥ śaktirbaliṣṭhairapi hanyate

2.22

अङ्गुष्ठतर्जनीवंशे पादाङ्गुष्ठे तथा ध्वनिः युद्धकाले च कर्त्तव्यो लक्षयोधाजयी भवेत्

aṅguṣṭhatarjanīvaṃśe pādāṅguṣṭhe tathā dhvaniḥ yuddhakāle ca karttavyo lakṣayodhājayī bhavet

2.23

भूतत्त्वे ह्युदरं रक्षेत् पादौ रक्षेज्जलेन च उरूश्च वह्नितलेन करौ रक्षेच्चवायुना

bhūtattve hyudaraṃ rakṣet pādau rakṣejjalena ca urūśca vahnitalena karau rakṣeccavāyunā

2.24

सूर्य्ये पूर्वे चोत्तरे च मुखं कृत्वा जयेन्नरः चन्द्र मुखं सदा कुर्य्याद्दक्षिणे पश्चिमे सुधीः

sūryye pūrve cottare ca mukhaṃ kṛtvā jayennaraḥ candra mukhaṃ sadā kuryyāddakṣiṇe paścime sudhīḥ

2.25

चिरयुद्धे शुभश्चन्द्रः शीघ्रयुद्धे रविस्तथा दूर युद्धे जयी चन्द्रः समीपस्थे दिवाकरः

cirayuddhe śubhaścandraḥ śīghrayuddhe ravistathā dūra yuddhe jayī candraḥ samīpasthe divākaraḥ

2.26

आकृष्य प्राणपवनं समारोहेच्च वाहनम् समुत्तरेत् पदं दद्यात् सर्वकार्य्याणि साधयेत्

ākṛṣya prāṇapavanaṃ samārohecca vāhanam samuttaret padaṃ dadyāt sarvakāryyāṇi sādhayet

2.27

न कालो विविधं घोरं न शस्त्रं न च पन्नगाः न शत्रुव्याधिचौराद्याः शून्यस्थान्नाशितुं क्षमाः

na kālo vividhaṃ ghoraṃ na śastraṃ na ca pannagāḥ na śatruvyādhicaurādyāḥ śūnyasthānnāśituṃ kṣamāḥ

2.28

अयनतिथिदिनेशैः स्वीयतत्त्वेऽध्व युक्तो यदि वहति कदाचिद्दैवयोगेन पुंसाम स जयति रिपुसैन्यं स्तम्भमात्रस्वरेण प्रभवति न च विघ्नं केशवस्यापि लोके

ayanatithidineśaiḥ svīyatattve'dhva yukto yadi vahati kadāciddaivayogena puṃsāma sa jayati ripusainyaṃ stambhamātrasvareṇa prabhavati na ca vighnaṃ keśavasyāpi loke

2.29

जीवेन शस्त्रं वघ्नीनाज्जीवेनैव विकासयेत् जीवेन प्रक्षिपेच्छस्त्रं युद्धे जयति सर्वदा

jīvena śastraṃ vaghnīnājjīvenaiva vikāsayet jīvena prakṣipecchastraṃ yuddhe jayati sarvadā

2.30

वामनाड्युपदये चन्द्रः कर्त्तव्यो वामसन्मुखः सूर्य्यचारे तथा सूर्य्यः पृष्ठे दक्षिणगो जयेत्

vāmanāḍyupadaye candraḥ karttavyo vāmasanmukhaḥ sūryyacāre tathā sūryyaḥ pṛṣṭhe dakṣiṇago jayet

2.31

दीप्ते कार्य्ये नाडी परिदिशि जीविता सदा कुर्य्यात् शान्ते च जीवसहितात्वेवं सिद्ध्यन्ति कार्य्याणि

dīpte kāryye nāḍī paridiśi jīvitā sadā kuryyāt śānte ca jīvasahitātvevaṃ siddhyanti kāryyāṇi

2.32

तत्त्वबलान्नाडीवलमधिकं प्रोक्तं कपर्दिना नियतम् ज्ञात्वैनं स्वर चारं नरो भवेत् कार्य्यनिपुणमतिः

tattvabalānnāḍīvalamadhikaṃ proktaṃ kapardinā niyatam jñātvainaṃ svara cāraṃ naro bhavet kāryyanipuṇamatiḥ

2.33

न देयमिति क्रुराय कुबुद्धयेऽशान्ताय गुरुद्रोहिणेऽभक्तायेति । देयमिति ब्रह्मचारिणे धर्म्मतः प्रजापालदुष्टदण्डविधारिणे साधुसंरक्ष काय इत्येवं प्रवचनं प्रवचनमिति

na deyamiti krurāya kubuddhaye'śāntāya gurudrohiṇe'bhaktāyeti | deyamiti brahmacāriṇe dharmmataḥ prajāpāladuṣṭadaṇḍavidhāriṇe sādhusaṃrakṣa kāya ityevaṃ pravacanaṃ pravacanamiti

3.1

अथ राहुयुक्ता योगिनीबलयुद्धं व्याख्यास्यामः प्रतिपन्नवम्यां प्रथमेऽर्द्धयामे राहु- युक्ता योगिनी पूर्वस्यां दिशि स्थिता भवति

atha rāhuyuktā yoginībalayuddhaṃ vyākhyāsyāmaḥ pratipannavamyāṃ prathame'rddhayāme rāhu- yuktā yoginī pūrvasyāṃ diśi sthitā bhavati

3.2

द्वितीया दशम्यां पञ्चमेऽर्द्धयामे राहु- सहिता शिवा प्रतीच्यामुदेति

dvitīyā daśamyāṃ pañcame'rddhayāme rāhu- sahitā śivā pratīcyāmudeti

3.3

तृतीयैकादश्यां तृतीयेऽर्द्धूयामे तमः संमिलिता पार्वती याम्यां परिभ्रमति

tṛtīyaikādaśyāṃ tṛtīye'rddhūyāme tamaḥ saṃmilitā pārvatī yāmyāṃ paribhramati

3.4

चतुर्थ्यां द्वादश्यां तु सप्तमेऽर्द्धयामे राहुना सह नगजा चोत्तरे ज्ञेया

caturthyāṃ dvādaśyāṃ tu saptame'rddhayāme rāhunā saha nagajā cottare jñeyā

3.5

पञ्चम्यामथ त्रयोदश्यामष्टमेऽर्द्धयामे स्वर्भानुयुता गौरी नैरृत्यामटति

pañcamyāmatha trayodaśyāmaṣṭame'rddhayāme svarbhānuyutā gaurī nairṛtyāmaṭati

3.6

गुहतिथौ चतुर्द्दश्यां च कात्यायनी पवनालये चायाति

guhatithau caturddaśyāṃ ca kātyāyanī pavanālaye cāyāti

3.7

सप्तमीपूर्णिमायां चतुर्थेऽर्द्ध प्रहरे विधुन्तुदेन साकं योगिनीं ऐशान्यां जानीयात्

saptamīpūrṇimāyāṃ caturthe'rddha prahare vidhuntudena sākaṃ yoginīṃ aiśānyāṃ jānīyāt

3.8

अष्टम्यमायां षष्ठेऽर्द्धयामे रुद्राणी तमोयुक्ता साग्नेय्यामीक्ष्यते

aṣṭamyamāyāṃ ṣaṣṭhe'rddhayāme rudrāṇī tamoyuktā sāgneyyāmīkṣyate

3.9

द्वितीयेऽर्द्धयामे सैंहिकेययुता इति राहुयुक्ता योगिनी उपग्राह्या

dvitīye'rddhayāme saiṃhikeyayutā iti rāhuyuktā yoginī upagrāhyā

ततो व्यूहादिभिर्युद्धकथनम् ये राजपुत्राः सामन्ता आप्ताः सेवकजातयः तान् सर्वानात्मनः पाश्वे रक्षायै स्थापयेन्नृपः

tato vyūhādibhiryuddhakathanam ye rājaputrāḥ sāmantā āptāḥ sevakajātayaḥ tān sarvānātmanaḥ pāśve rakṣāyai sthāpayennṛpaḥ

परस्परानुरक्ता ये योधा शर्ङ्गधनुर्धराः युद्धज्ञास्तुरगारूढास्ते जयन्ति रणे रिपुन्

parasparānuraktā ye yodhā śarṅgadhanurdharāḥ yuddhajñāsturagārūḍhāste jayanti raṇe ripun

एकः कापुरुषो दीर्णो दारयेन्महतीञ्चनुम् तद्दीर्णानु दीर्य्यन्ते योधाः शूरतमा अपि

ekaḥ kāpuruṣo dīrṇo dārayenmahatīñcanum taddīrṇānu dīryyante yodhāḥ śūratamā api

अतो वै कातरं राजा बलेनैव नियोजयेत् द्वाविमौ पुरुषो लोके सूर्य्यमण्डलभेदिनौ

ato vai kātaraṃ rājā balenaiva niyojayet dvāvimau puruṣo loke sūryyamaṇḍalabhedinau

परिव्राड्योगयुक्तश्च रणे चाभिमुखो हतः यत्र यत्र हतः शूरः शत्रुभिः परिवेष्टितः

parivrāḍyogayuktaśca raṇe cābhimukho hataḥ yatra yatra hataḥ śūraḥ śatrubhiḥ pariveṣṭitaḥ

अक्षयं लभते लोकं यदि क्लीबं न भाषते

akṣayaṃ labhate lokaṃ yadi klībaṃ na bhāṣate

मूर्छितं नैव विकलं नाशस्त्रं नान्ययोधिनम् पलायमानं शरणं गतञ्चैव न हिंसयेत्

mūrchitaṃ naiva vikalaṃ nāśastraṃ nānyayodhinam palāyamānaṃ śaraṇaṃ gatañcaiva na hiṃsayet

भीरुः पलायमानोऽपि नान्वेष्टव्यो बलीयसा कदाचिच्छूरतां याति शरणेऽकृतनिश्चयः संभृत्य महतीं सेनां चतुरङ्गां महीपतिः

bhīruḥ palāyamāno'pi nānveṣṭavyo balīyasā kadācicchūratāṃ yāti śaraṇe'kṛtaniścayaḥ saṃbhṛtya mahatīṃ senāṃ caturaṅgāṃ mahīpatiḥ

व्यूहयित्वाग्रतः शूरान् स्थापयेज्जयलिप्सया पृष्ठेन वायवो वान्ति पृष्ठे भानुवयांसि च अनुप्लवते मेघाश्च यस्य तस्य रणे जयः अपूर्णेनैव मर्त्तव्यं सम्पूर्णेनैव जीवनम्

vyūhayitvāgrataḥ śūrān sthāpayejjayalipsayā pṛṣṭhena vāyavo vānti pṛṣṭhe bhānuvayāṃsi ca anuplavate meghāśca yasya tasya raṇe jayaḥ apūrṇenaiva marttavyaṃ sampūrṇenaiva jīvanam

तस्माद्धैर्य्यं विधायैव हन्तव्या परवाहिनी जिते लक्ष्मीर्मृते स्वर्गः कीर्त्तिश्च धरणीतले

tasmāddhairyyaṃ vidhāyaiva hantavyā paravāhinī jite lakṣmīrmṛte svargaḥ kīrttiśca dharaṇītale

तस्माद्धैर्य्यं विधायैव हन्तव्या परवाहिनी अधर्म्मः क्षत्रियस्यैषः यद् व्याधिं मरणं गृहे यदाजौ निधनं याति सोऽस्य धर्म्मः सनातनः

tasmāddhairyyaṃ vidhāyaiva hantavyā paravāhinī adharmmaḥ kṣatriyasyaiṣaḥ yad vyādhiṃ maraṇaṃ gṛhe yadājau nidhanaṃ yāti so'sya dharmmaḥ sanātanaḥ

अथ व्यूहानाह युवास्वरे मध्यसेना युद्धं कुर्य्यादतन्द्रिता द्वेसेने पार्श्वयोश्चैका पृष्ठतो रक्षयेत् सदा एकां विकटसेनान्तु दूरस्थां भ्रामयेद् युधि

atha vyūhānāha yuvāsvare madhyasenā yuddhaṃ kuryyādatandritā dvesene pārśvayoścaikā pṛṣṭhato rakṣayet sadā ekāṃ vikaṭasenāntu dūrasthāṃ bhrāmayed yudhi

दण्डव्यूहश्च शकटो वराहो मकरस्तथा सूचीव्यूहोऽथ गरुडः पद्मव्यूहादयो मताः

daṇḍavyūhaśca śakaṭo varāho makarastathā sūcīvyūho'tha garuḍaḥ padmavyūhādayo matāḥ

एतान् व्यूहान् परिव्यूह्य सेनापतिर्वसेत् सदा बला ध्यक्षादिकान् सर्वान् सर्वदिक्षु नियोजयेत् ततो दण्डव्यूहः सर्वतो भये दण्डव्यूहर् रचनाकार्य्या

etān vyūhān parivyūhya senāpatirvaset sadā balā dhyakṣādikān sarvān sarvadikṣu niyojayet tato daṇḍavyūhaḥ sarvato bhaye daṇḍavyūhar racanākāryyā

पृष्ठतो भये शकटव्यूहम् पश्चाद्देशे भये समुत्पन्ने शकटाकारेण व्यूहं रचयेत् पार्श्वभये वराहव्यूहो गरुडव्यूहो वा विधेयः दक्षिणवामपार्श्वयोर्भये उपस्थिते वराहव्यूहो गरुडव्यूहो वा कार्य्यः अग्रतोभये पिपीलिकाव्यूहम् सन्मुखे शत्रुभये जाते पिपीलिका पंक्तिरूपः व्यूहविन्यासः कार्य्यः स्वल्पा युद्धं कुर्य्यात् बह्वी सेना च सर्वतो भ्रमेत् सम भूमौ चाश्ववारा युद्धं कुर्य्युः जले करि तुम्बी दृतिं नौकाभिर्युद्धं विधेयम् पदातयो भुशुण्डीं गृहीत्वा वा धनूं षिचादाय वने वृक्षेष्वन्यर्धाना वारुढा भूत्वा युद्ध्यत स्थले चर्म्मखङ्गभल्लैर्युद्ध्यत युद्धाहङ्कारिण- स्तुङ्गा अग्रे स्थाप्याः अन्ये पश्चात्

pṛṣṭhato bhaye śakaṭavyūham paścāddeśe bhaye samutpanne śakaṭākāreṇa vyūhaṃ racayet pārśvabhaye varāhavyūho garuḍavyūho vā vidheyaḥ dakṣiṇavāmapārśvayorbhaye upasthite varāhavyūho garuḍavyūho vā kāryyaḥ agratobhaye pipīlikāvyūham sanmukhe śatrubhaye jāte pipīlikā paṃktirūpaḥ vyūhavinyāsaḥ kāryyaḥ svalpā yuddhaṃ kuryyāt bahvī senā ca sarvato bhramet sama bhūmau cāśvavārā yuddhaṃ kuryyuḥ jale kari tumbī dṛtiṃ naukābhiryuddhaṃ vidheyam padātayo bhuśuṇḍīṃ gṛhītvā vā dhanūṃ ṣicādāya vane vṛkṣeṣvanyardhānā vāruḍhā bhūtvā yuddhyata sthale carmmakhaṅgabhallairyuddhyata yuddhāhaṅkāriṇa- stuṅgā agre sthāpyāḥ anye paścāt

अथ सेनानयः तत्रादौ व्याकरणशिक्षां वक्ष्यामो राज्ञे नृपतिर्लौट् लकारस्य कुर्य्यात् कण्ठस्थितानि च रूपाणि कार्य्यं सिद्ध्यर्थं ह्याज्ञैषा मम गाधिज मध्यमपुरुषस्यैव प्रयोगान्यो विचिन्तयेत्

atha senānayaḥ tatrādau vyākaraṇaśikṣāṃ vakṣyāmo rājñe nṛpatirlauṭ lakārasya kuryyāt kaṇṭhasthitāni ca rūpāṇi kāryyaṃ siddhyarthaṃ hyājñaiṣā mama gādhija madhyamapuruṣasyaiva prayogānyo vicintayet

सेनानीः प्रतिदिनं सम्यङ् न केनापि स हन्यते मध्यममपुरुषोद्भूताः प्रयोगाः सर्वसिद्धिदाः तैरेव साधयेद्राज्ञां पुरुषा राजभृत्यकाः

senānīḥ pratidinaṃ samyaṅ na kenāpi sa hanyate madhyamamapuruṣodbhūtāḥ prayogāḥ sarvasiddhidāḥ taireva sādhayedrājñāṃ puruṣā rājabhṛtyakāḥ

पदातिक्रमः समोच्चा द्विपदा ग्राह्या ह्रसमानाः कदाचन कूर्द्दने धावने ये वै समास्ते कार्य्यसाधकाः

padātikramaḥ samoccā dvipadā grāhyā hrasamānāḥ kadācana kūrddane dhāvane ye vai samāste kāryyasādhakāḥ

पश्चाद् गमनं स्थिरीकरणं श्यनं धावनं तथा चलनं परसेनायां पार्श्वदिक्षु च कारयेत्

paścād gamanaṃ sthirīkaraṇaṃ śyanaṃ dhāvanaṃ tathā calanaṃ parasenāyāṃ pārśvadikṣu ca kārayet

षष्ठ स्थाने ग्रहा येषां क्रूराः पापाः पतन्ति हि ते युद्धे युद्ध्यतां वीरा नान्ये कार्य्यकरा यतः व भ ध ड छ क वर्णा ह्यादिमायां प्रकल्प्य तदनु हि अच वर्णा आदिकाः सर्व्वलेख्याः उपरिगतभवस्तान् स्थाप्य सर्वान् क्रमेण भवति च युवयस्या युद्ध्यतां सा प्रसेना

ṣaṣṭha sthāne grahā yeṣāṃ krūrāḥ pāpāḥ patanti hi te yuddhe yuddhyatāṃ vīrā nānye kāryyakarā yataḥ va bha dha ḍa cha ka varṇā hyādimāyāṃ prakalpya tadanu hi aca varṇā ādikāḥ sarvvalekhyāḥ uparigatabhavastān sthāpya sarvān krameṇa bhavati ca yuvayasyā yuddhyatāṃ sā prasenā

उदाहरणम् यथा विवस्वान् भरतः धन्धुमारः डित्थः छत्रपतिः कुक्षिः अस्या वस्त्राणि पीतानि ध्वजापीता च तद्वति युद्धयूपस्तथा पितश्चतुरस्राङ्कसंयुतः

udāharaṇam yathā vivasvān bharataḥ dhandhumāraḥ ḍitthaḥ chatrapatiḥ kukṣiḥ asyā vastrāṇi pītāni dhvajāpītā ca tadvati yuddhayūpastathā pitaścaturasrāṅkasaṃyutaḥ

श्वेतरक्तहरिकृष्णाश्चान्या सेना हित्वादिवत् कर्त्तव्यापार्थिवैर्नित्यं जयलाभसुखेच्छुमिः

śvetaraktaharikṛṣṇāścānyā senā hitvādivat karttavyāpārthivairnityaṃ jayalābhasukhecchumiḥ

ब्रह्मा विष्णुश्च रुद्रश्च चन्द्रसूर्यौ यथाक्रमम् अधीशाः पञ्चसेनानां विज्ञेयाः शृणु गाधिज

brahmā viṣṇuśca rudraśca candrasūryau yathākramam adhīśāḥ pañcasenānāṃ vijñeyāḥ śṛṇu gādhija

ब्रह्मा रुद्रबले जीयाद्विष्णुश्चन्द्रबले जयेत् रुद्रः सूर्य्यबलं प्राप्य चन्द्रो ब्रह्मबलं युधि सूर्य्यो विष्णुबलं लब्ध्वा जयेच्चैव नसंशयः

brahmā rudrabale jīyādviṣṇuścandrabale jayet rudraḥ sūryyabalaṃ prāpya candro brahmabalaṃ yudhi sūryyo viṣṇubalaṃ labdhvā jayeccaiva nasaṃśayaḥ

अ ब्रह्मा विष्णुरिरुद्र उश्चन्द्रत्वे च भास्करः ओ ज्ञेयो पार्थिवैर्नित्यं अस्त्रशस्त्रविचक्षणैः

a brahmā viṣṇurirudra uścandratve ca bhāskaraḥ o jñeyo pārthivairnityaṃ astraśastravicakṣaṇaiḥ

प्राप्य स्वं स्वं बलं सेना पूर्बोक्ता युद्धगा यदि क्षणार्द्धेनारीन् सर्वाण्मारयन्तीति रुद्रवाक्

prāpya svaṃ svaṃ balaṃ senā pūrboktā yuddhagā yadi kṣaṇārddhenārīn sarvāṇmārayantīti rudravāk

अथाश्वक्रमः मण्डलं चतुरस्रञ्च गोमूत्रञ्चार्द्धचन्द्रकम् नागपाशक्रमेणैव भ्रामयेत् कटपञ्चकम्

athāśvakramaḥ maṇḍalaṃ caturasrañca gomūtrañcārddhacandrakam nāgapāśakrameṇaiva bhrāmayet kaṭapañcakam

अथ हस्तिक्रमः गजानां पर्वतारोहणम् जलगमनम् धावनम् उत्थानम् उपवेशनम् अलातचक्रादिभिर्भीतिनि वारणम् कार्य्यम् रथक्रमः रथाश्वसाधनन्तु समादिस्थले विधेयम् अथ सेनापति करणविधिं वक्ष्यामः शृणु भो राजर्षे विश्वामित्र आकारविद्याबल- युक्तं क्षत्रियसेनापतिं विद्ध्यात् । तस्यैते नियमाः समस्तवाहिनीं एकदृष्ट्यावलोकयेत् । अन्यत् सर्व्वान् पदातीन् परिश्रमसदृशमधिकारं दद्यात् । व्यूहरचनायामति निपुणाश्च भवेत् स एव सेनानीर्विधेयः । इति अथ शिक्षा तत्रादौ षठनपाठनविधिं ब्रूमा । आदौ क्षात्रकोशव्याकरण सूत्राण्यध्येतव्यानि द्वावध्यायौ सप्तमाष्टमौमनोर्मिताक्षराव्यवहाराध्यायश्च जयार्णव विष्णुयामलविजयाख्यस्वरशास्त्राण्यपराणि च पटितव्यानि ततः सरहस्यं धनुर्व्वेदमापठेत् हन्तव्याहन्तव्योपदेशः सुप्तं प्रसुप्तमुन्मन्तं ह्यकच्छं शस्त्रवर्जितम् बालं स्त्रियं दीनवाक्यं धावन्तं नैवद्यातयेत्

atha hastikramaḥ gajānāṃ parvatārohaṇam jalagamanam dhāvanam utthānam upaveśanam alātacakrādibhirbhītini vāraṇam kāryyam rathakramaḥ rathāśvasādhanantu samādisthale vidheyam atha senāpati karaṇavidhiṃ vakṣyāmaḥ śṛṇu bho rājarṣe viśvāmitra ākāravidyābala- yuktaṃ kṣatriyasenāpatiṃ viddhyāt | tasyaite niyamāḥ samastavāhinīṃ ekadṛṣṭyāvalokayet | anyat sarvvān padātīn pariśramasadṛśamadhikāraṃ dadyāt | vyūharacanāyāmati nipuṇāśca bhavet sa eva senānīrvidheyaḥ | iti atha śikṣā tatrādau ṣaṭhanapāṭhanavidhiṃ brūmā | ādau kṣātrakośavyākaraṇa sūtrāṇyadhyetavyāni dvāvadhyāyau saptamāṣṭamaumanormitākṣarāvyavahārādhyāyaśca jayārṇava viṣṇuyāmalavijayākhyasvaraśāstrāṇyaparāṇi ca paṭitavyāni tataḥ sarahasyaṃ dhanurvvedamāpaṭhet hantavyāhantavyopadeśaḥ suptaṃ prasuptamunmantaṃ hyakacchaṃ śastravarjitam bālaṃ striyaṃ dīnavākyaṃ dhāvantaṃ naivadyātayet

धम्मार्थं यः त्यजेत् प्राणान् किं तीर्थे च जपे च किम् मुक्तिभागी भवेत् सोऽपि निरयं नाधिगच्छति

dhammārthaṃ yaḥ tyajet prāṇān kiṃ tīrthe ca jape ca kim muktibhāgī bhavet so'pi nirayaṃ nādhigacchati

ब्राह्मणार्थे गवार्थे वा स्त्रीणां बालवधेषु च प्राणत्यागपरो यस्तु सवै मोक्षमवाप्नुयात्

brāhmaṇārthe gavārthe vā strīṇāṃ bālavadheṣu ca prāṇatyāgaparo yastu savai mokṣamavāpnuyāt