1. Chapter

प्रज्ञापारमिता-हृदय-सूत्र ओं नमो भगवत्यै आर्य-प्रजापारमितायै! आर्य आवलोकितेश्वरो बोधिसत्त्वो गम्भीरं प्रज्ञापारमिता-चार्यां चरमाणो व्यवलोकयति स्म, पञ्च-स्कन्धास् तांश् च स्वभाव-शून्यान् पश्यति स्म. इह शारिपुत्र रूपं शून्यता, शून्यत्ऽऐव रूपं, रूपान् न पृथक् शून्यता, शून्यताया न पृथग् रूपं, यद् रूपं सा शून्यता, या शून्यता तद् रूपं. एवम् एव वेदना-संज्ञा-संस्कारा-विज्ञानम्. इह शारिपुत्र सर्व-धर्माः शून्यता-लक्षणा अनुत्पन्ना अनिरुद्धा अमला अविमला अनूना अपरिपूर्णाः. तस्माच् छारिपुत्र शून्यतायां न रूपं न वेदना न संज्ञा न संस्काराः न विज्ञानं, न चक्षुः-श्रोत्र-घ्राण-जिह्वा-काय-मनांसि, न रूप-शब्द-गन्ध-रस-स्प्रष्टव्य-धर्माः, न चक्षुर्-धातुर् यावन् न मनो-विज्ञान-धातुः, न्ऽआविद्या न्ऽआविद्या-क्षयो यावन् न जरा-मरणं न जरा-मरण-क्षयो न दुःख-समुदय-निरोध-मार्गा न ज्ञानं न प्राप्तिर् न्ऽआप्राप्तिः. तस्माच् छारिपुत्र अप्राप्तित्वाद् बोधिसत्त्वो प्रज्ञा-पारमिताम् आश्रित्य विहरत्य् अचित्त्ऽआवरणः. चित्त्ऽआवरण-नास्तित्वाद् अत्रस्तो विपर्यास्ऽआतिक्रान्तो निष्ठा-निर्वाणः. त्रध्व-व्यवस्थिताः सर्व-बुद्धाः प्रज्ञापारमिताम् आश्रित्य अनुत्तरां सम्यक्-सम्बोधिम् अभिसम्बुद्धाः. तस्माज् ज्ञातव्यं प्रज्ञापारमिता महा-मन्त्रो महा-विद्या-मन्त्रोऽनुत्तर-मन्त्रो समसम-मन्त्रः सर्व-दुःख-प्रशमनः सत्यम् अमिथ्यत्वात्. प्रज्ञापारमितायाम् उक्तो मन्त्रः, तद्यथा - ओं गते गते पारगते पारसंगते बोधि स्वाहा. इत्य् आर्य-प्रज्ञापारमिता-हृदयं समाप्तम्.

prajñāpāramitā-hṛdaya-sūtra oṃ namo bhagavatyai ārya-prajāpāramitāyai! ārya āvalokiteśvaro bodhisattvo gambhīraṃ prajñāpāramitā-cāryāṃ caramāṇo vyavalokayati sma, pañca-skandhās tāṃś ca svabhāva-śūnyān paśyati sma. iha śāriputra rūpaṃ śūnyatā, śūnyat'aiva rūpaṃ, rūpān na pṛthak śūnyatā, śūnyatāyā na pṛthag rūpaṃ, yad rūpaṃ sā śūnyatā, yā śūnyatā tad rūpaṃ. evam eva vedanā-saṃjñā-saṃskārā-vijñānam. iha śāriputra sarva-dharmāḥ śūnyatā-lakṣaṇā anutpannā aniruddhā amalā avimalā anūnā aparipūrṇāḥ. tasmāc chāriputra śūnyatāyāṃ na rūpaṃ na vedanā na saṃjñā na saṃskārāḥ na vijñānaṃ, na cakṣuḥ-śrotra-ghrāṇa-jihvā-kāya-manāṃsi, na rūpa-śabda-gandha-rasa-spraṣṭavya-dharmāḥ, na cakṣur-dhātur yāvan na mano-vijñāna-dhātuḥ, n'āvidyā n'āvidyā-kṣayo yāvan na jarā-maraṇaṃ na jarā-maraṇa-kṣayo na duḥkha-samudaya-nirodha-mārgā na jñānaṃ na prāptir n'āprāptiḥ. tasmāc chāriputra aprāptitvād bodhisattvo prajñā-pāramitām āśritya viharaty acitt'āvaraṇaḥ. citt'āvaraṇa-nāstitvād atrasto viparyās'ātikrānto niṣṭhā-nirvāṇaḥ. tradhva-vyavasthitāḥ sarva-buddhāḥ prajñāpāramitām āśritya anuttarāṃ samyak-sambodhim abhisambuddhāḥ. tasmāj jñātavyaṃ prajñāpāramitā mahā-mantro mahā-vidyā-mantro'nuttara-mantro samasama-mantraḥ sarva-duḥkha-praśamanaḥ satyam amithyatvāt. prajñāpāramitāyām ukto mantraḥ, tadyathā - oṃ gate gate pāragate pārasaṃgate bodhi svāhā. ity ārya-prajñāpāramitā-hṛdayaṃ samāptam.