101. 101. राशिविभागाध्यायः

अश्विन्योऽथ भरण्यो बहुलापादश्च कीर्त्यते मेषः । वृषभो बहुलाशेषं रोहिण्योऽर्धं च मृगशिरसः ।। १०१.०१ ।।

aśvinyo'tha bharaṇyo bahulāpādaśca kīrtyate meṣaḥ / vṛṣabho bahulāśeṣaṃ rohiṇyo'rdhaṃ ca mṛgaśirasaḥ // 101.01 //

मृगशिरोऽर्धं रौद्रं पुनर्वसोर् अंशकत्रयं मिथुनः । पादश्च पुनर्वसुतस्तिष्यः श्लेषा च कर्कटकः ।। १०१.०२ ।।

mṛgaśiro'rdhaṃ raudraṃ punarvasor aṃśakatrayaṃ mithunaḥ / pādaśca punarvasutastiṣyaḥ śleṣā ca karkaṭakaḥ // 101.02 //

सिंहोऽथ मघा पूर्वा च फल्गुनी पाद उत्तरायाश्च । तत्परिशेषं हस्तश्चित्राद्यर्धं च कन्याख्यः ।। १०१.०३ ।।

siṃho'tha maghā pūrvā ca phalgunī pāda uttarāyāśca / tatpariśeṣaṃ hastaścitrādyardhaṃ ca kanyākhyaḥ // 101.03 //

तौलिनि चित्रान्त्यार्धं स्वातिः पादत्रयं विशाखायाः । अलिनि विशाखापादस्तथानुराधान्विता ज्येष्ठा ।। १०१.०४ ।।

taulini citrāntyārdhaṃ svātiḥ pādatrayaṃ viśākhāyāḥ / alini viśākhāpādastathānurādhānvitā jyeṣṭhā // 101.04 //

मूलं अषाढा पूर्वा प्रथमश्चाप्युत्तरांशको धन्वी । मकरस्तत्परिषेशं श्रवणः पूर्वं धनिष्ठार्धम् ।। १०१.०५ ।।

mūlaṃ aṣāḍhā pūrvā prathamaścāpyuttarāṃśako dhanvī / makarastatpariṣeśaṃ śravaṇaḥ pūrvaṃ dhaniṣṭhārdham // 101.05 //

कुम्भोऽन्त्यधनिष्ठार्धं शतभिषगंशत्रयं च पूर्वायाः । भद्रपदायाः शेषं तथोत्तरा रेवती च झषः ।। १०१.०६ ।।

kumbho'ntyadhaniṣṭhārdhaṃ śatabhiṣagaṃśatrayaṃ ca pūrvāyāḥ / bhadrapadāyāḥ śeṣaṃ tathottarā revatī ca jhaṣaḥ // 101.06 //

अश्विनीपित्र्यमूलऽद्या मेषसिंहहयऽदयः । विषमऋक्षान्निवर्तन्ते पादवृद्ध्या यथोत्तरम् ।। १०१.०७ ।।

aśvinīpitryamūla'dyā meṣasiṃhahaya'dayaḥ / viṣamaṛkṣānnivartante pādavṛddhyā yathottaram // 101.07 //