20. 20. ग्रहशृङ्गाटकाध्यायः

यस्यां दिशि दृश्यन्ते विशन्ति ताराग्रहा रविं सर्वे । भवति भयं दिशि तस्यां आयुधकोपक्षुधऽआतङ्कैः ।। २०.०१ ।।

yasyāṃ diśi dṛśyante viśanti tārāgrahā raviṃ sarve / bhavati bhayaṃ diśi tasyāṃ āyudhakopakṣudha'ātaṅkaiḥ // 20.01 //

चक्रधनुःशृङ्गाटकदण्डपुरप्रासवज्रसंस्थानाः । क्षुद्वृष्टिकरा लोके समराय च मानवैन्द्राणाम् ।। २०.०२ ।।

cakradhanuḥśṛṅgāṭakadaṇḍapuraprāsavajrasaṃsthānāḥ / kṣudvṛṣṭikarā loke samarāya ca mānavaindrāṇām // 20.02 //

यस्मिन्खांशे दृश्या ग्रहमाला दिनकरे दिनान्तगते । तत्रऽन्यो भवति नृपः परचक्रौपद्रवश्च महान् ।। २०.०३ ।।

yasminkhāṃśe dṛśyā grahamālā dinakare dināntagate / tatra'nyo bhavati nṛpaḥ paracakraupadravaśca mahān // 20.03 //

तस्मिन्न् ऋक्षे कुर्युः समागमं तज्जनान्ग्रहा हन्युः । अविभेदिनः परस्परं अमलमयूखाः शिवास्तेषाम् ।। २०.०४ ।।

tasminn ṛkṣe kuryuḥ samāgamaṃ tajjanāngrahā hanyuḥ / avibhedinaḥ parasparaṃ amalamayūkhāḥ śivāsteṣām // 20.04 //

ग्रहसंवर्तसमागमसम्मोहसमाजसन्निपातऽख्याः । कोशश्चेत्येतेषां अभिधास्ये लक्षणं सफलं ।। २०.०५ ।।

grahasaṃvartasamāgamasammohasamājasannipāta'khyāḥ / kośaścetyeteṣāṃ abhidhāsye lakṣaṇaṃ saphalaṃ // 20.05 //

एकऋक्षे चत्वारः सह पौरैर्यायिनोऽथ वा पञ्च । संवर्तो नाम भवेत्शिखिराहुयुतः स सम्मोहः ।। २०.०६ ।।

ekaṛkṣe catvāraḥ saha paurairyāyino'tha vā pañca / saṃvarto nāma bhavetśikhirāhuyutaḥ sa sammohaḥ // 20.06 //

पौरः पौरसमेतो यायी सह यायिना समाजाख्यः । यमजीवसङ्गमेऽन्यो यद्यागच्छेत्तदा कोशः ।। २०.०७ ।।

pauraḥ paurasameto yāyī saha yāyinā samājākhyaḥ / yamajīvasaṅgame'nyo yadyāgacchettadā kośaḥ // 20.07 //

उदितः पश्चादेकः प्राक्चान्यो यदि स सन्निपाताख्यः । अविकृततनवः स्निग्धा विपुलाश्च समागमे धन्याः ।। २०.०८ ।।

uditaḥ paścādekaḥ prākcānyo yadi sa sannipātākhyaḥ / avikṛtatanavaḥ snigdhā vipulāśca samāgame dhanyāḥ // 20.08 //

समौ तु संवर्तसमागमाख्यौ सम्मोहकोशौ भयदौ प्रजानाम् । समाजसंज्ञो सुसमा प्रदिष्टा वैरप्रकोपः खलु सन्निपाते ।। २०.०९ ।।

samau tu saṃvartasamāgamākhyau sammohakośau bhayadau prajānām / samājasaṃjño susamā pradiṣṭā vairaprakopaḥ khalu sannipāte // 20.09 //