22. 22. गर्भधारणाध्यायः

ज्यैष्ठसितेऽष्टम्याद्यश्चत्वारो वायुधारणा दिवसाः । मृदुशुभपवनाः शस्ताः स्निग्धघनस्थगितगगनाश्च ।। २२.०१ ।।

jyaiṣṭhasite'ṣṭamyādyaścatvāro vāyudhāraṇā divasāḥ / mṛduśubhapavanāḥ śastāḥ snigdhaghanasthagitagaganāśca // 22.01 //

तत्रएव स्वात्याद्ये वृष्टे भचतुष्टये क्रमात्मासाः । श्रावणपूर्वा ज्ञेयाः परिस्रुता धारणास्ताः स्युः । २२.०२ ।।

tatraeva svātyādye vṛṣṭe bhacatuṣṭaye kramātmāsāḥ / śrāvaṇapūrvā jñeyāḥ parisrutā dhāraṇāstāḥ syuḥ / 22.02 //

यदि ता स्युरेकरूपाः शुभास्ततः सान्तरास्तु न शिवाय । तस्करभयदाश्चौक्ताः श्लोकाश्चाप्यत्र वासिष्ठाः ।। २२.०३ ।।

yadi tā syurekarūpāḥ śubhāstataḥ sāntarāstu na śivāya / taskarabhayadāścauktāḥ ślokāścāpyatra vāsiṣṭhāḥ // 22.03 //

सविद्युतः सपृषतः सपांशुउत्करमारुताः । सार्कचन्द्रपरिच्छन्ना धारणाः शुभधारणाः ।। २२.०४ ।।

savidyutaḥ sapṛṣataḥ sapāṃśuutkaramārutāḥ / sārkacandraparicchannā dhāraṇāḥ śubhadhāraṇāḥ // 22.04 //

यदा तु विद्युतः श्रेष्ठाः शुभाशाः प्रत्युपस्थिताः । तदापि सर्वसस्यानां वृद्धिं ब्रूयाद्विचक्षणः ।। २२.०५ ।।

yadā tu vidyutaḥ śreṣṭhāḥ śubhāśāḥ pratyupasthitāḥ / tadāpi sarvasasyānāṃ vṛddhiṃ brūyādvicakṣaṇaḥ // 22.05 //

सपांशुवर्षाः सापश्च शुभा बालक्रिया अपि । पक्षिणां सुस्वरा वाचः क्रीडा पांशुजलादिषु ।। २२.०६ ।।

sapāṃśuvarṣāḥ sāpaśca śubhā bālakriyā api / pakṣiṇāṃ susvarā vācaḥ krīḍā pāṃśujalādiṣu // 22.06 //

रविचन्द्रपरीवेषाः स्निग्धा नात्यन्तदूषिताः । वृष्टिस्तदापि विज्ञेया सर्वसस्यअर्थसाधिका ।। २२.०७ ।।

ravicandraparīveṣāḥ snigdhā nātyantadūṣitāḥ / vṛṣṭistadāpi vijñeyā sarvasasyaarthasādhikā // 22.07 //

मेघाः स्निग्धाः संहताश्च प्रदक्षिणगतिक्रियाः । तदा स्यान्महती वृष्टिः सर्वसस्यअभिवृद्धये ।। २२.०८ ।।

meghāḥ snigdhāḥ saṃhatāśca pradakṣiṇagatikriyāḥ / tadā syānmahatī vṛṣṭiḥ sarvasasyaabhivṛddhaye // 22.08 //