35. 35. इन्द्रायुद्धलक्षणाध्यायः

सूर्यस्य विविधवर्णाः पवनेन विघट्टिताः कराः साभ्रे । वियति धनुःसंस्थाना ये दृश्यन्ते तदिन्द्रधनुः ।। ३५.०१ ।।

sūryasya vividhavarṇāḥ pavanena vighaṭṭitāḥ karāḥ sābhre / viyati dhanuḥsaṃsthānā ye dṛśyante tadindradhanuḥ // 35.01 //

के चिदनन्तकुलौरगनिःश्वासौद्भूतं आहुराचार्याः । तद्यायिनां नृपाणां अभिमुखं अजयऽवहं भवति ।। ३५.०२ ।।

ke cidanantakulauraganiḥśvāsaudbhūtaṃ āhurācāryāḥ / tadyāyināṃ nṛpāṇāṃ abhimukhaṃ ajaya'vahaṃ bhavati // 35.02 //

अच्छिन्नं अवनिगाढं द्युतिमत्स्निग्धं घनं विविधवर्णम् । द्विरुदितं अनुलोमं च प्रशस्तं अम्भः प्रयच्छति च ।। ३५.०३ ।।

acchinnaṃ avanigāḍhaṃ dyutimatsnigdhaṃ ghanaṃ vividhavarṇam / dviruditaṃ anulomaṃ ca praśastaṃ ambhaḥ prayacchati ca // 35.03 //

विदिगुद्भूतं दिक्स्वामिनाशनं व्यभ्रजं मरककारि । पाटलपीतकनीलैः शस्त्राग्निक्षुत्कृता दोषाः ।। ३५.०४ ।।

vidigudbhūtaṃ diksvāmināśanaṃ vyabhrajaṃ marakakāri / pāṭalapītakanīlaiḥ śastrāgnikṣutkṛtā doṣāḥ // 35.04 //

जलमध्येऽनावृष्टिर्भुवि सस्यवधस्तरौ स्थिते व्याधिः । वाल्मीके शस्त्रभयं निशि सचिववधाय धनुरैन्द्रम् ।। ३५.०५ ।।

jalamadhye'nāvṛṣṭirbhuvi sasyavadhastarau sthite vyādhiḥ / vālmīke śastrabhayaṃ niśi sacivavadhāya dhanuraindram // 35.05 //

वृष्टिं करोत्यवृष्ट्यां वृष्टिं वृष्ट्यां निवारयत्यैन्द्र्याम् । पश्चात्सदैव वृष्टिं कुलिशभृतश्चापं आचष्टे ।। ३५.०६ ।।

vṛṣṭiṃ karotyavṛṣṭyāṃ vṛṣṭiṃ vṛṣṭyāṃ nivārayatyaindryām / paścātsadaiva vṛṣṭiṃ kuliśabhṛtaścāpaṃ ācaṣṭe // 35.06 //

चापं मघोनः कुरुते निशायाम् आखण्डलायां दिशि भूपपीडाम् । याम्यापरौदक्प्रभवं निहन्यात् सेनापतिं नायकमन्त्रिणौ च ।। ३५.०७ ।।

cāpaṃ maghonaḥ kurute niśāyām ākhaṇḍalāyāṃ diśi bhūpapīḍām / yāmyāparaudakprabhavaṃ nihanyāt senāpatiṃ nāyakamantriṇau ca // 35.07 //

निशि सुरचापं सितवर्णाद्यं जनयति पीडां द्विजपूर्वाणाम् । भवति च यस्यां दिशि तद्देश्यं नरपतिमुख्यं नचिराद्धन्यात् ।। ३५.०८ ।।

niśi suracāpaṃ sitavarṇādyaṃ janayati pīḍāṃ dvijapūrvāṇām / bhavati ca yasyāṃ diśi taddeśyaṃ narapatimukhyaṃ nacirāddhanyāt // 35.08 //