51. 51. पिटकलक्षणाध्यायः

सितरक्तपीतकृष्णा विप्रादीनां क्रमेण पिटका ये । ते क्रमशः प्रोक्तफला वर्णानां नाग्रजातानाम् ।। ५१.०१ ।।

sitaraktapītakṛṣṇā viprādīnāṃ krameṇa piṭakā ye / te kramaśaḥ proktaphalā varṇānāṃ nāgrajātānām // 51.01 //

सुस्निग्धव्यक्तशोभाः शिरसि धनचयं मूर्ध्नि सौभाग्यं आराद् दौर्भाग्यं भ्रूयुगोत्थाः प्रियजनघटनां आशु दुःशीलतां च । तन्मध्योत्थाश्च शोकं नयनपुटगता नेत्रयोरिष्टदृष्टिं प्रव्रज्यां शङ्खदेशेऽश्रुजलनिपतनस्थानगा रान्ति चिन्ताम् ।। ५१.०२ ।।

susnigdhavyaktaśobhāḥ śirasi dhanacayaṃ mūrdhni saubhāgyaṃ ārād daurbhāgyaṃ bhrūyugotthāḥ priyajanaghaṭanāṃ āśu duḥśīlatāṃ ca / tanmadhyotthāśca śokaṃ nayanapuṭagatā netrayoriṣṭadṛṣṭiṃ pravrajyāṃ śaṅkhadeśe'śrujalanipatanasthānagā rānti cintām // 51.02 //

घ्राणागण्डे वसनसुतदाश्चओष्ठयोरन्नलाभं कुर्युस्तद्वच्चिबुकतलगा भूरि वित्तं ललाटे । हन्वोरेवं गलकृतपदा भूषणान्यन्नपाने श्रोत्रे षड्भूतणगणं अपि ज्ञानं आत्मस्वरूपम् ।। ५१.०३ ।।

ghrāṇāgaṇḍe vasanasutadāścaoṣṭhayorannalābhaṃ kuryustadvaccibukatalagā bhūri vittaṃ lalāṭe / hanvorevaṃ galakṛtapadā bhūṣaṇānyannapāne śrotre ṣaḍbhūtaṇagaṇaṃ api jñānaṃ ātmasvarūpam // 51.03 //

शिरःसन्धिग्रीवाहृदयकुचपार्श्वौरसि गता अयोघातं घातं सुततनयलाभं शुचं अपि । प्रियप्राप्तिं स्कन्धेऽप्यटनं अथ भिक्षार्थं असकृद् विनाशं कक्षोत्था विदधति धनानां बहुमुखम् ।। ५१.०४ ।।

śiraḥsandhigrīvāhṛdayakucapārśvaurasi gatā ayoghātaṃ ghātaṃ sutatanayalābhaṃ śucaṃ api / priyaprāptiṃ skandhe'pyaṭanaṃ atha bhikṣārthaṃ asakṛd vināśaṃ kakṣotthā vidadhati dhanānāṃ bahumukham // 51.04 //

दुःखशत्रुनिचयस्य विनाशं पृष्ठबाहुयुगजा रचयन्ति । संयमं च मणिबन्धनजाता भूषणऽद्यं उपबाहुयुगुत्थाः ।। ५१.०५ ।।

duḥkhaśatrunicayasya vināśaṃ pṛṣṭhabāhuyugajā racayanti / saṃyamaṃ ca maṇibandhanajātā bhūṣaṇa'dyaṃ upabāhuyugutthāḥ // 51.05 //

धनाप्तिं सौभाग्यं शुचं अपि कराङ्गुल्युदरगाः सुपानान्नं नाभौ तदध इह चौरैर्धनहृतिम् । धनं धान्यं बस्तौ युवतिं अथ मेढ्रे सुतनयान् धनं सौभाग्यं वा गुदवृषणजाता विदधति ।। ५१.०६ ।।

dhanāptiṃ saubhāgyaṃ śucaṃ api karāṅgulyudaragāḥ supānānnaṃ nābhau tadadha iha caurairdhanahṛtim / dhanaṃ dhānyaṃ bastau yuvatiṃ atha meḍhre sutanayān dhanaṃ saubhāgyaṃ vā gudavṛṣaṇajātā vidadhati // 51.06 //

ऊर्वोर्यानाङ्गनालाभं जान्वोः शत्रुजनात्क्षतिम् । शस्त्रेण जङ्घयोर्गुल्फेऽध्वबन्धक्लेशदायिनः ।। ५१.०७ ।।

ūrvoryānāṅganālābhaṃ jānvoḥ śatrujanātkṣatim / śastreṇa jaṅghayorgulphe'dhvabandhakleśadāyinaḥ // 51.07 //

स्फिक्पार्ष्णिपादजाता धननाशागम्यगमनं अध्वानम् ।। बन्धनं अङ्गुलिनिचयेऽङ्गुष्ठे च ज्ञातिलोकतः पूजाम् ।। ५१.०८ ।।

sphikpārṣṇipādajātā dhananāśāgamyagamanaṃ adhvānam // bandhanaṃ aṅgulinicaye'ṅguṣṭhe ca jñātilokataḥ pūjām // 51.08 //

उत्पातगण्डपिटका दक्षिणतो वामतस्त्वभीघाताः । धन्या भवन्ति पुंसां तद्विपरीताश्च नारीणाम् ।। ५१.०९ ।।

utpātagaṇḍapiṭakā dakṣiṇato vāmatastvabhīghātāḥ / dhanyā bhavanti puṃsāṃ tadviparītāśca nārīṇām // 51.09 //

इति पिटकविभागः प्रोक्त आमूर्धतोऽयं व्रणतिलकविभागोऽप्येवं एव प्रकल्प्यः । भवति मशकलक्ष्मऽवर्तजन्मापि तद्वन् निगदितफलकारि प्राणिनां देहसंस्थम् ।। ५१.१० ।।

iti piṭakavibhāgaḥ prokta āmūrdhato'yaṃ vraṇatilakavibhāgo'pyevaṃ eva prakalpyaḥ / bhavati maśakalakṣma'vartajanmāpi tadvan nigaditaphalakāri prāṇināṃ dehasaṃstham // 51.10 //