56. 56. वज्रलेपलक्षणाध्यायः

आमं तिन्दुकं आमं कपित्थकं पुष्पं अपि च शाल्मल्याः । बीजानि शल्लकीनां धन्वनवल्को वचा चैति ।। ५६.०१ ।।

āmaṃ tindukaṃ āmaṃ kapitthakaṃ puṣpaṃ api ca śālmalyāḥ / bījāni śallakīnāṃ dhanvanavalko vacā caiti // 56.01 //

एतैः सलिलद्रोणः क्वाथयितव्योऽष्टभागशेषश्च । अवतार्योऽस्य च कल्को द्रव्यैरेतैः समनुयोज्यः ।। ५६.०२ ।।

etaiḥ saliladroṇaḥ kvāthayitavyo'ṣṭabhāgaśeṣaśca / avatāryo'sya ca kalko dravyairetaiḥ samanuyojyaḥ // 56.02 //

श्रीवासकरसगुग्गुलुभल्लातककुन्दुरूकसर्जरसैः । अतसीबिल्वैश्च युतः कल्कोऽयं वज्रलेपऽख्यः ।। ५६.०३ ।।

śrīvāsakarasaguggulubhallātakakundurūkasarjarasaiḥ / atasībilvaiśca yutaḥ kalko'yaṃ vajralepa'khyaḥ // 56.03 //

प्रासादहर्म्यवलभीलिङ्गप्रतिमासु कुड्यकूपेषु । सन्तप्तो दातव्यो वर्षसहस्रायुतस्थायी ।। ५६.०४ ।।

prāsādaharmyavalabhīliṅgapratimāsu kuḍyakūpeṣu / santapto dātavyo varṣasahasrāyutasthāyī // 56.04 //

लाक्षाकुन्दुरुगुग्गुलुगृहधूमकपित्थबिल्वमध्यानि । नागफलनिम्बतिन्दुकमदनफलमधूकमञ्जिष्ठाः ।। ५६.०५ ।।

lākṣākunduruguggulugṛhadhūmakapitthabilvamadhyāni / nāgaphalanimbatindukamadanaphalamadhūkamañjiṣṭhāḥ // 56.05 //

सर्जरसरसऽमलकानि चैति कल्कः कृतो द्वितीयोऽयम् । वज्राख्यः प्रथमगुणैरयं अपि तेष्वेव कार्येषु ।। ५६.०६ ।।

sarjarasarasa'malakāni caiti kalkaḥ kṛto dvitīyo'yam / vajrākhyaḥ prathamaguṇairayaṃ api teṣveva kāryeṣu // 56.06 //

गोमहिषाजविषाणैः खररोम्णा महिषचर्मगव्यैश्च । निम्बकपित्थरसैः सह वज्रतलो नाम कल्कोऽन्यः ।। ५६.०७ ।।

gomahiṣājaviṣāṇaiḥ khararomṇā mahiṣacarmagavyaiśca / nimbakapittharasaiḥ saha vajratalo nāma kalko'nyaḥ // 56.07 //

अष्टौ सीसकभागाः कांसस्य द्वौ तु रीतिकाभागः । मयकथितो योगोऽयं विज्ञेयो वज्रसङ्घातः ।। ५६.०८ ।।

aṣṭau sīsakabhāgāḥ kāṃsasya dvau tu rītikābhāgaḥ / mayakathito yogo'yaṃ vijñeyo vajrasaṅghātaḥ // 56.08 //