70. 70. वस्त्रच्छेदलक्षणाध्यायः

प्रभूतवस्त्रदाश्विनी भरण्यथापहारिणी । प्रदह्यतेऽग्निदैवते प्रजेस्वरेऽर्थसिद्धयः ।। ७०.०१ ।।

prabhūtavastradāśvinī bharaṇyathāpahāriṇī / pradahyate'gnidaivate prajesvare'rthasiddhayaḥ // 70.01 //

मृगे तु मूषकाद्भयं व्यसुत्वं एव शाङ्करे । पुनर्वसौ शुभऽगमस्तदग्रभे धनैर्युतिः ।। ७०.०२ ।।

mṛge tu mūṣakādbhayaṃ vyasutvaṃ eva śāṅkare / punarvasau śubha'gamastadagrabhe dhanairyutiḥ // 70.02 //

भुजङ्गभे विलुप्यते मघासु मृत्युं आदिशेत् । भगऽह्वये नृपाद्भयं धनऽगमाय चौत्तरा ।। ७०.०३ ।।

bhujaṅgabhe vilupyate maghāsu mṛtyuṃ ādiśet / bhaga'hvaye nṛpādbhayaṃ dhana'gamāya cauttarā // 70.03 //

करेण कर्मसिद्धयः शुभऽगमस्तु चित्रया । शुभं च भोज्यं आनिले द्विदैवते जनप्रियः ।। ७०.०४ ।।

kareṇa karmasiddhayaḥ śubha'gamastu citrayā / śubhaṃ ca bhojyaṃ ānile dvidaivate janapriyaḥ // 70.04 //

सुहूद्युतिश् च मित्रभे तदग्रभेऽम्बरक्षयः । जलप्लुतिश्च नैरृते रुजो जलाधिदैवते ।। ७०.०५ ।।

suhūdyutiś ca mitrabhe tadagrabhe'mbarakṣayaḥ / jalaplutiśca nairṛte rujo jalādhidaivate // 70.05 //

मिष्टं अन्नं अपि वैश्वदैवते वैष्णवे भवति नेत्ररोगता । धान्यलब्धिर् अपि वासवे विदुर्वारुणे विषकृतं महद्भयम् ।। ७०.०६ ।।

miṣṭaṃ annaṃ api vaiśvadaivate vaiṣṇave bhavati netrarogatā / dhānyalabdhir api vāsave vidurvāruṇe viṣakṛtaṃ mahadbhayam // 70.06 //

भद्रपदासु भयं सलिलौत्थं तत्परतश्च भवेत्सुतलब्धिः । रत्नयुतिं कथयन्ति च पौष्णे योऽभिनवाम्बरं इच्छति भोक्तुम् ।। ७०.०७ ।।

bhadrapadāsu bhayaṃ salilautthaṃ tatparataśca bhavetsutalabdhiḥ / ratnayutiṃ kathayanti ca pauṣṇe yo'bhinavāmbaraṃ icchati bhoktum // 70.07 //

विप्रमतादथ भूपतिदत्तं यच्च विवाहविधावभिलब्धम् । [क्.७ ।।

vipramatādatha bhūpatidattaṃ yacca vivāhavidhāvabhilabdham / [k.7 //

तेषु गुणै रहितेष्वपि भोक्तुं नूतनं अम्बरमिष्टफलं स्यात् ।।] क्.७१ ।।

teṣu guṇai rahiteṣvapi bhoktuṃ nūtanaṃ ambaramiṣṭaphalaṃ syāt //] k.71 //

भोक्तुं नवाम्बरं शस्तं ऋक्षेऽपि गुणवर्जिते । विवाहे राजसम्माने ब्रह्मणाणां च सम्मते ।। ७०.०८ ।।

bhoktuṃ navāmbaraṃ śastaṃ ṛkṣe'pi guṇavarjite / vivāhe rājasammāne brahmaṇāṇāṃ ca sammate // 70.08 //

वस्त्रस्य कोणेषु वसन्ति देवा नराश्च पाशान्तदशान्तमध्ये । शेषास्त्रयश्चात्र निशाचरांशास्तथएव शय्याआसनपादुकासु ।। ७०.०९ ।।

vastrasya koṇeṣu vasanti devā narāśca pāśāntadaśāntamadhye / śeṣāstrayaścātra niśācarāṃśāstathaeva śayyāāsanapādukāsu // 70.09 //

लिप्ते मषीगोमयकर्दमऽद्यैश्छिन्ने प्रदग्धे स्फुटिते च विन्द्यात् । पुष्टं नवेऽल्पाल्पतरं च भुक्ते पापं शुभं चाधिकं उत्तरीये ।। ७०.१० ।।

lipte maṣīgomayakardama'dyaiśchinne pradagdhe sphuṭite ca vindyāt / puṣṭaṃ nave'lpālpataraṃ ca bhukte pāpaṃ śubhaṃ cādhikaṃ uttarīye // 70.10 //

रुग्राक्षसांशेस्वथ वाऽपि मृत्युः पुञ्जन्मतेजश्च मनुष्यभागे । भागेऽमराणां अथ भोगवृद्धिः प्रान्तेषु सर्वत्र वदन्त्यनिष्टम् ।। ७०.११ ।।

rugrākṣasāṃśesvatha vā'pi mṛtyuḥ puñjanmatejaśca manuṣyabhāge / bhāge'marāṇāṃ atha bhogavṛddhiḥ prānteṣu sarvatra vadantyaniṣṭam // 70.11 //

कङ्कप्लवौलूककपोतकाकक्रव्यादगोमायुखरौष्ट्रसर्पैः । छेदऽकृतिर्दैवतभागगापि पुंसां भयं मृत्युसमं करोति ।। ७०.१२ ।।

kaṅkaplavaulūkakapotakākakravyādagomāyukharauṣṭrasarpaiḥ / cheda'kṛtirdaivatabhāgagāpi puṃsāṃ bhayaṃ mṛtyusamaṃ karoti // 70.12 //

छत्रध्वजस्वस्तिकवर्धमानश्रीवृक्षकुम्भाम्बुजतोरणऽद्यैः । छेदऽकृतिर्नैरृतभागगापि पुंसां विधत्ते न चिरेण लक्ष्मीम् ।। ७०.१३ ।।

chatradhvajasvastikavardhamānaśrīvṛkṣakumbhāmbujatoraṇa'dyaiḥ / cheda'kṛtirnairṛtabhāgagāpi puṃsāṃ vidhatte na cireṇa lakṣmīm // 70.13 //