89. 89. शिवारुताध्यायः

श्वभिः शृगालाः सदृशाः फलेन विशेष एषां शिशिरे मदाप्तिः । हूहू रुतान्ते परतश्च टाटा पूर्णः स्वरोऽन्ये कथिताः प्रदीप्ताः ।। ८९.०१ ।।

śvabhiḥ śṛgālāḥ sadṛśāḥ phalena viśeṣa eṣāṃ śiśire madāptiḥ / hūhū rutānte parataśca ṭāṭā pūrṇaḥ svaro'nye kathitāḥ pradīptāḥ // 89.01 //

लोमाशिकायाः खलु कक्कशब्दः पूर्णः स्वभावप्रभवः स तस्याः । येऽन्ये स्वरास्ते प्रकृतेरपेताः सर्वे च दीप्ता इति सम्प्रदिष्टाः ।। ८९.०२ ।।

lomāśikāyāḥ khalu kakkaśabdaḥ pūrṇaḥ svabhāvaprabhavaḥ sa tasyāḥ / ye'nye svarāste prakṛterapetāḥ sarve ca dīptā iti sampradiṣṭāḥ // 89.02 //

पूर्वोदीच्योः शिवा शस्ता शान्ता सर्वत्र पूजिता । धूमिताभिमुखी हन्ति स्वरदीप्ता दिगीश्वरान् ।। ८९.०३ ।।

pūrvodīcyoḥ śivā śastā śāntā sarvatra pūjitā / dhūmitābhimukhī hanti svaradīptā digīśvarān // 89.03 //

राजा कुमारो नेता च दूतः श्रेष्ठी चरो द्विजः । गजाध्यक्षश्च पूर्वाआद्याः क्षत्रियऽद्याश्चतुर्दिशम् ।। ८९.०४ ।।

rājā kumāro netā ca dūtaḥ śreṣṭhī caro dvijaḥ / gajādhyakṣaśca pūrvāādyāḥ kṣatriya'dyāścaturdiśam // 89.04 //

सर्वदिक्ष्वशुभा दीप्ता विशेषेणाह्न्यशोभना । पुरे सैन्येऽपसव्या च कष्टा सूर्योन्मुखी शिवा ।। ८९.०५ ।।

sarvadikṣvaśubhā dīptā viśeṣeṇāhnyaśobhanā / pure sainye'pasavyā ca kaṣṭā sūryonmukhī śivā // 89.05 //

याहिइत्यग्निभयं शास्ति टाटैति मृतवेदिका । धिग्धिग्दुष्कृतिम् आचष्टे सज्वाला देशनाशिनी ।। ८९.०६ ।।

yāhiityagnibhayaṃ śāsti ṭāṭaiti mṛtavedikā / dhigdhigduṣkṛtim ācaṣṭe sajvālā deśanāśinī // 89.06 //

नैव दारुणतां एके सज्वालायाः प्रचक्षते । अर्काद्यनलवत्तस्या वक्त्रं लालास्वभावतः ।। ८९.०७ ।।

naiva dāruṇatāṃ eke sajvālāyāḥ pracakṣate / arkādyanalavattasyā vaktraṃ lālāsvabhāvataḥ // 89.07 //

अन्यप्रतिरुता याम्या साउद्बन्धमृतशंसिनी । वारुण्यनुरुता साएव शंसते सलिले मृतम् ।। ८९.०८ ।।

anyapratirutā yāmyā sāudbandhamṛtaśaṃsinī / vāruṇyanurutā sāeva śaṃsate salile mṛtam // 89.08 //

अक्षोभः श्रवणं चैष्टं धनप्राप्तिः प्रियागमः । क्षोभः प्रधानभेदश्च वाहनानां च सम्पदः ।। ८९.०९ ।।

akṣobhaḥ śravaṇaṃ caiṣṭaṃ dhanaprāptiḥ priyāgamaḥ / kṣobhaḥ pradhānabhedaśca vāhanānāṃ ca sampadaḥ // 89.09 //

फलं आ सप्तमादेतदग्राह्यं परतो रुतम् । याम्यायां तद्विपर्यस्तं फलं षट्पञ्चमादृते ।। ८९.१० ।।

phalaṃ ā saptamādetadagrāhyaṃ parato rutam / yāmyāyāṃ tadviparyastaṃ phalaṃ ṣaṭpañcamādṛte // 89.10 //

या रोमाञ्चं मनुष्याणां शकृन्मूत्रं च वाजिनाम् । रावात्त्रासं च जनयेत्सा शिवा न शिवप्रदा ।। ८९.११ ।।

yā romāñcaṃ manuṣyāṇāṃ śakṛnmūtraṃ ca vājinām / rāvāttrāsaṃ ca janayetsā śivā na śivapradā // 89.11 //

मौनं गता प्रतिरुते नरद्विरदवाजिभिः । या शिवा सा शिवं सैन्ये पुरे वा सम्प्रयच्छति ।। ८९.१२ ।।

maunaṃ gatā pratirute naradviradavājibhiḥ / yā śivā sā śivaṃ sainye pure vā samprayacchati // 89.12 //

भेभाइति शिवा भयङ्करी भोभो व्यापदं आदिशेच्च सा । मृतिबन्धनिवेदिनी फिफे हूहू चऽत्महिता शिवा स्वरे ।। ८९.१३ ।।

bhebhāiti śivā bhayaṅkarī bhobho vyāpadaṃ ādiśecca sā / mṛtibandhanivedinī phiphe hūhū ca'tmahitā śivā svare // 89.13 //

शान्ता त्ववर्णात्परं आरुवन्ती टाटां उदीर्णां इति वाश्यमाना । टेटे च पूर्वं परतश्च थेथे तस्याः स्वतुष्टिप्रभवं रुतं तत् ।। ८९.१४ ।।

śāntā tvavarṇātparaṃ āruvantī ṭāṭāṃ udīrṇāṃ iti vāśyamānā / ṭeṭe ca pūrvaṃ parataśca thethe tasyāḥ svatuṣṭiprabhavaṃ rutaṃ tat // 89.14 //

उच्चैर्घोरं वर्णं उच्चार्य पूर्वं पश्चात्क्रोशेत्क्रोष्टुकस्यानुरूपम् । या सा क्षेमं प्राह वित्तस्य चाप्तिं संयोगं वा प्रोषितेन प्रियेण ।। ८९.१५ ।।

uccairghoraṃ varṇaṃ uccārya pūrvaṃ paścātkrośetkroṣṭukasyānurūpam / yā sā kṣemaṃ prāha vittasya cāptiṃ saṃyogaṃ vā proṣitena priyeṇa // 89.15 //