16. Mahayanasutralamkara — chapter 15

|| निगमनश्लोको गतार्थः | || महायानसूत्रालंकारे अववादानुशासन्यधिकारश्चतुर्दशः || पञ्चदशो ऽधिकारः उद्दानम् अधिमुक्तेर्बहुलता धर्मपर्येष्टिदेशने प्रतिपत्तिस्तथा सम्यगववादानुशासनं || ॥ १५.१ ॥

|| nigamanaśloko gatārthaḥ | || mahāyānasūtrālaṃkāre avavādānuśāsanyadhikāraścaturdaśaḥ || pañcadaśo 'dhikāraḥ uddānam adhimukterbahulatā dharmaparyeṣṭideśane pratipattistathā samyagavavādānuśāsanaṃ || (15.1)

|| उपायसहितकर्मविभागे चत्वारः श्लोकाः | यथा प्रतिष्ठा वनदेहिपर्वतप्रवाहिनीनां पृथिवी समन्ततः | तथैव दानादिशुभस्य सर्वतो बुधेषु कर्म त्रिविधं निरुच्यते || ॥ १५.२ ॥

|| upāyasahitakarmavibhāge catvāraḥ ślokāḥ | yathā pratiṣṭhā vanadehiparvatapravāhinīnāṃ pṛthivī samantataḥ | tathaiva dānādiśubhasya sarvato budheṣu karma trividhaṃ nirucyate || (15.2)

|| अनेन श्लोकेन समुत्थानोपायं दर्शयति | सर्वप्रकारस्य दानादिशुभस्य पारमिताबोधिपक्षादिकस्य कर्मत्रयसमुत्थितत्वात् | बुधेष्विति बोधिसत्त्वेषु | वनादिग्रहणमुपभोज्या स्थिरस्थिरवस्तुनिदर्शनार्थम् | सुदुष्करैः कर्मभिरुद्यतात्मनां विचित्ररूपैर्बहुकल्पनिर्गतैः | न कायवाक्चित्तमयस्य कर्मणो जिनात्मजानां भवतीह संनतिः || ॥ १५.३ ॥

|| anena ślokena samutthānopāyaṃ darśayati | sarvaprakārasya dānādiśubhasya pāramitābodhipakṣādikasya karmatrayasamutthitatvāt | budheṣviti bodhisattveṣu | vanādigrahaṇamupabhojyā sthirasthiravastunidarśanārtham | suduṣkaraiḥ karmabhirudyatātmanāṃ vicitrarūpairbahukalpanirgataiḥ | na kāyavākcittamayasya karmaṇo jinātmajānāṃ bhavatīha saṃnatiḥ || (15.3)

|| यथा विषाच्छस्रमहाशनाद्[ने] रिपोर्निवारयेदात्महितः स्वमाश्रयं | निहीनयानाद्विविधाज्जिनात्मजो निवारयेत्कर्म तथा त्रयात्मकं || ॥ १५.४ ॥

|| yathā viṣācchasramahāśanād[ne] ripornivārayedātmahitaḥ svamāśrayaṃ | nihīnayānādvividhājjinātmajo nivārayetkarma tathā trayātmakaṃ || (15.4)

|| आभ्यां श्लोकाभ्यां व्युत्थानोपायं दर्शयति | महायानखेदान्ययानपातव्युत्थानाद्यथाक्रमं | संनतिः खेद इत्यर्थः | विषादिसाधर्म्यं हीनयानप्रतिसंयुक्तस्य कर्मणो हीनयानचित्तपरिणामनात् महायाने कुशलमूलसमुच्छेदनात् अनुत्पन्नकुशलमूलानुत्पादाय | उत्पन्न कुशलमूल[स?]स्य ध्वंसनात् | बुद्धत्वसंपत्प्राप्तिविबन्धनाच्च | न कर्मिणः कर्म न कर्मणः क्रियां सदाविकल्पः समुदीक्षते त्रिधा | ततो ऽस्य तत्कर्म विशुद्धिपारगं भवत्यनन्तं तदुपायसंग्रहात् || ॥ १५.५ ॥

|| ābhyāṃ ślokābhyāṃ vyutthānopāyaṃ darśayati | mahāyānakhedānyayānapātavyutthānādyathākramaṃ | saṃnatiḥ kheda ityarthaḥ | viṣādisādharmyaṃ hīnayānapratisaṃyuktasya karmaṇo hīnayānacittapariṇāmanāt mahāyāne kuśalamūlasamucchedanāt anutpannakuśalamūlānutpādāya | utpanna kuśalamūla[sa?]sya dhvaṃsanāt | buddhatvasaṃpatprāptivibandhanācca | na karmiṇaḥ karma na karmaṇaḥ kriyāṃ sadāvikalpaḥ samudīkṣate tridhā | tato 'sya tatkarma viśuddhipāragaṃ bhavatyanantaṃ tadupāyasaṃgrahāt || (15.5)